Pas një jave, më 4 gusht 2017, Fondi Monetar Ndërkombëtar do t’i ndërpresë marrëveshjet për ekonomi për Kosovën.
Burime diplomatike kanë treguar për Gazetën Express se FMN nuk do ta vazhdojë marrëveshjen e saj për përkrahje të ekonomisë së Kosovës, afati i së cilës skadon të premten e 4 gushtit 2017.
Krejt kjo, pasi që Qeveria e Kosovës nuk ka arritur ta bindë Fondin Monetar Ndërkombëtar që një pjesë e fondeve të tyre të jepen për pensione për veteranët e UCK’së, numri i të cilëve dyshohet të jetë i fryrë, tregojnë të njëjtat burime për Gazetën Express.
Nga kjo shkëputje e marrëveshjes, Kosova humb mbi 16 milionë euro përkrahje ekonomike nga FMN’ja. Gazeta Express ka provuar qysh të mërkurën të marrë konfirmim nga zyra e FMN’së në Prishtinë.
Edhe pse zëdhënësja e këtij institucioni ndërkombëtar, Merita Kernja, përmes telefonit kishte paralajmëruar se do t’u përgjigjej me e-mail pyetjeve të gazetës, ajo s’e ka bërë një gjë të tillë deri më sot. (b.an)
