Gjykata e Lartë do të shqyrtojë sot kërkesën e kryebashkiakut Erion Veliaj për t’u liruar nga qelia.
Kujtojmë që kreu i Bashkisë Tiranë u arrestua më 10 shkurt nën akuzat për korrupsion e pastrim parash dhe fshehje pasurie.
Seanca do të zhvillohet në orën 12:00 në dhomë këshillimi pa praninë e palëve, me relatore gjyqtaren Albana Boksi dhe anëtarë Medi Bici e Sokol Binaj.
Në të njëjtën datë do të zhvillohet edhe rekursi i biznesmenit Elman Abule, që ndodhet nën masën e sigurisë “arrest shtëpie” dhe akuzohet për pastrim parash në dosjen e Erion Veliajt.
Më 17 qershor, GJKKO la në fuqi masën “arrest me burg” për Erion Veliajn duke rrëzuar kërkesën e tij për lirim kundrejt garancisë pasurore.
“GJKKO vendosi azhdimin e masës së sigurimit “Arrest në burg” parashikuar nga neni 238 i K.Pr.Penale, caktuar ndaj personit nën hetim Erion Veliaj me vendimet Nr. 7. datë 09.02.2025 dhe Nr. 14, datë 12.02.2025 të Gjykatës së Posaçme të Shkallës së Parë për Korrupsionin dhe Krimin e Organizuar”, thuhej në vendim.
Në dosjen e SPAK ka të akuzuar dhe nën hetim edhe familjarë të Veliajt dhe disa biznesmenë.
