Ai tregon në një intervistë për “GSH” prapaskenat e kafes me Edi Ramën.
Z.Duka, si po ecën fushata e kandidatit të propozuar prej jush në Kolonjë dhe i mbështetur nga koalicioni opozitar?
Natyrisht janë ditët e para të fushatës dhe deri më tani konstatoj një mbarëvajtje normale. Unë e kam shoqëruar zotin Hajro në disa takime elektorale në Kolonjë dhe do të vazhdoj ta bëj. Më ka bërë përshtypje problematika e gjerë që ka kjo zonë, e cila për fat të keq është lënë jashtë vëmendjes shtetërore, ndonëse ka potenciale të jashtëzakonshme zhvillimore. Nga ana tjetër konstatoj me kënaqësi entuziazmin me të cilin është mirëpritur kandidatura jonë dhe besoj që më 20 nëntor ne do ta fitojmë Bashkinë e Kolonjës. Bashkë me zotin Hajro, i cili është bir i asaj zone dhe e njeh më mirë se kushdo tjetër, kemi përgatitur një program realist, me prioritete konkrete, që e shpëton Kolonjën nga braktisja dhe rrënimi i mëtejshëm.
Çfarë ndodhi në takimin me kryeministrin Rama, a folët për një bashkëpunim elektoral mes PAA-së dhe PS-së në zgjedhjet e vitit 2017?
Unë e kam sqaruar edhe më herët këtë çështje. Ishte thjesht një takim i rastësishëm pas ceremonisë së 65-vjetorit të Universitetit Bujqësor të Tiranës. Kryeministri më ftoi për një kafe dhe natyrisht pranova. Ndonëse ne jemi rivalë në politikë, për çështje të interesit të përbashkët duhet të diskutojmë dhe bashkëpunojmë. Ndamë mendime për reformimin e Universitetit Bujqësor të Tiranës dhe ngritjen e tij në një nivel tjetër, në mënyrë që t’u shërbejë sa më mirë politikave publike për bujqësinë, blegtorinë, peshkimin, agroindustrinë etj.A ju kërkoi kryeministri t’i bashkoheni koalicionit të PS-së për zgjedhjet e ardhshme?Nuk bëmë një bisedë të tillë, pasi Partia Agrare Ambientaliste është pozicionuar qartë në opozitën e kryesuar nga Partia Demokratike dhe do të dalë në zgjedhje si një forcë opozitare. Ne jemi natyrshëm në aleancën që na takon, sepse çështjet e zonave rurale e mjedisit nuk janë zgjidhur nga qeverisja e tanishme. As problemet e bujqësisë, blektorisë, agroindustrisë, apo peshkimit s’janë trajtuar si duhet nga qeveria aktuale.
Kohët e fundit ka pasur zëra, ndonëse periferikë, që ju kanë akuzuar si tregtar partish apo mandate deputetësh?
Gjatë gjithë karrierës sime politike në këto vite mbahem mend gjerësisht si njeri i fjalës së mbajtur dhe që s’kam bërë kurrë pazare personale në dëm të interesit publik apo kundër vullnetit të qytetarëve që më kanë votuar e mbështetur. Unë garova në zgjedhjet parlamentare të tri viteve më parë nën siglën e një partie tjetër dhe pavarësisht se jam sot në krye të një projekti të ri politik, mbetem brenda koalicionit opozitar. Do të dal në zgjedhje për të kërkuar sërish votën e qytetarëve si pjesë e këtij koalicioni opozitar. Prandaj akuza të tilla, që në fakt janë tejet periferike, i cilësoj të pabaza dhe besoj thjesht dashakeqëse. Vokacioni im i brendshëm për bujqësinë dhe zhvillimin e zonave rurale, besoj se gjen më shumë terren brenda një subjekti politik që i konsideron si shtyllën e vet kurrizore këto çështje, prandaj vendosa të marrë drejtimin e Partisë Agrare Ambientaliste.
Si po ecën organizimi PAA-së pas mbajtjes së Konventës Kombëtare?
Konventa ishte një ngjarje e rëndësishme për ne dhe u mirëprit gjerësisht nga qytetarët. Pati një jehonë të madhe gjithashtu në media dhe besoj jemi në rrugë të mbarë për të konkurruar denjësisht në zgjedhjet e ardhshme. Vazhdojmë me intensitet punën për të konsoliduar strukturat tona në çdo nivel, ndërsa konstatoj me kënaqësi afrimin në radhët e PAA-së të personaliteteve nga fusha të ndryshme. Kjo na jep shpresë për t’u rritur më tej si parti dhe natyrisht për t’u ofruar shqiptarëve një alternativë realisht ndryshe, sepse ka ardhur koha për zgjidhje./GSH/a.m.
