Kryeministri, Edi Rama ka zhvilluar dy takime me Kancelaren e Gjermanisë, Angela Merkel gjatë Samitit të NATO-s që po mbahet në Varshavë të Polonisë.
Një burim nga delegacioni i Shqipërisë në këtë Samit, bën të ditur për “Panorama” se, takimi i parë është zhvilluar pas darkës së mbrëmshme të liderëve, kurse takimi i dytë sot në mjediset e Samitit.
Gjatë këtyre dy takimeve, Merkel dhe Rama kanë diskutuar për disa çështje, por tema më “e nxehtë” ka qenë ecuria e reformës në drejtësi, për të cilën Kancelarja gjermane ka shfaqur mjaft interes.
Berlini po e ndjek me vëmendje shumë të veçantë procesin e reformës tha burimi për “Panorama”, gjë të cilën e konfirmon dhe fakti se një delegacion parlamentar gjerman vizitoi pak ditë më parë Shqipërinë.
Merkel është angazhuar personalisht për nxitjen e integrimit në Bashkimin Evropian të vendeve të Ballkanit Perëndimor dhe të Shqipërisë si pjesë e rajonit.
Konfirmohet se finalizimi i reformës në drejtësi, që pritet të miratohet në Parlament me 21 korrik, të përcaktojë për mirë ose për keq qëndrimin e Berlinit në raport me hapjen e negociatave për anëtarësimin e Shqipërisë në BE./a.m.
