Prapaskenat, çfarë fshihet pas kërkesës për falje të Hillary për skandalin e email-eve
Ish-sekretarja e Shtetit ndryshon strategji për të kuruar hemarrogjinë e skandalit të email-eve.
“Ishte një gabim. Më vjen keq, marr përgjegjësitë”. Më në fund, kur nuk ishte më e mundur asnjë lloj mbrojtjeje dhe kur sondazhet po vazhdonin të binin, vjen edhe ndjesa.
Si një film i parë, Hillary ndjek skenarin tipik të Clinton-ëve: fillimisht për muaj të tërë kërkoi të mohonte skandalin e maileve privatë të përdorur kur ishte sekretare e Shtetit. Më pas, pak e nga pak, nisi të pranonte që mund të ishte sjellë ndryshe, por pa lejuar asgjë që mund të përdorej kundër saj në gjykatë.
Në këtë mënyrë pranoi gabimin dhe kërkoi falje në një intervistë të dhënë dje për televizionin ABC, me shpresën që do të mjaftojë për të mbyllur skandalin dhe të kurojë hemorragjinë e popullaritetit që është vëzhguar gjatë sondazheve.
Skandali i maileve privatë shpërtheu disa muaj më parë, dhe në fillim dukej si një manovër e republikanëve që kërkonin të provonin fajësinë e saj në sulmin e konsullatës amerikane në Bengasi.
Kur ishte sekretare e Shtetit, në fakt, Hillary kishte përdorur për emailet një server personal, që sipas kundërshtarëve të saj shërbente për të fshehur çfarë bënte dhe thoshte.
Heshtja e saj nga ana tjetër e transformoi këtë problem në një kërcënim të vërtetë për garën e saj presidenciale, duke sjellë në vëmendje besueshmërinë e dobët të Bill Clinton. Hillary zbriti në sondazhe, ku tani ka vetëm 40% të votave, ndërsa Biden është rritur 20% pa garuar ende.
Në këtë mënyrë erdhi edhe vendimi për të pranuar gabimin dhe për të kërkuar falje, duke kërkuar të ndryshojë strategji.
Nëse do të funksionojë së bashku me taktikën e buzëqeshjes, kjo është një tjetër çështje, që do të verifikohet në ditët e ardhshme./La Stampa
