Dhjetëra maturantë të cilët nuk janë shpallur fitues në fazën e parë të pranimeve në universitetet e vendit kanë protestuar sot përpara godinës së Parlamentit, ku janë shprehur kundër formulës së përzgjedhjes dhe dëgjimit të zërit të tyre nga deputetët. Ata kanë kërkuar takim me Ministren e Arsimit e Sportit Lindita Nikolla.
Në mënyrë të organizuar ata janë shprehur se, nuk janë të qartë për vijimin e raundit të dytë të pranimeve, ndonëse Ministrja e Arsimit dhe disa dekanë e rektori i Universitetit të Tiranës sqaron çdo detaj. Sipas tyre, amullia që është krijuar ka vetëm një qëllim, kalimin e tyre tek universitetet private.
Por një gjë e tillë nuk mund të arrihet nëse maturanti që në momentin e përzgjedhjes së lëndëve nuk e ka përzgjedhur alternativën e vijimit të studimeve të larta në një universitet privat.
“Ata që kanë nota të mira nuk janë shpallur fitues. Kjo amulli ëhstë bërë që studfentët të shkojnë drejt privatit, duke bërë korrupsion.” Tha një nga maturantët.
Ndërsa një tjetër tha se “Ne nuk ndalim protestat, kërkojmë rikthimin e sistemit të mëparshëm,nuk jemi të përgatitur me këtë lloj sistemi për pranimin në universitete”.
Një përfaqësi e maturantëve kanë kërkuar që të takohen me Ministren e Arsimit Lindita Nikolla. Në protestën e sotme, ndryshe nga ajo e djeshmja, nuk kanë qenë të pranishëm përfaqësues apo militantë të Partisë Demokratike.
ma.me
