Praktika për mësuesit e rinj nuk do të jetë më 1 vit, por vetëm tre muaj. Ministrja e Arsimit, Evis Kushi ka dhënë detaje për urdhrin e ri të miratuar në muajin korrik për praktikat mësimore.
Sipas ministres, shkurtimi i kësaj periudhe vjen si unifikim i kohëzgjatjes së praktikës edhe me profesionet e tjera të rregulluara, si ai i mjekut, i infermierit dhe i psikologut, të cilët gjithashtu e kanë kohëzgjatjen e praktikës 3 muaj.
Kushi thotë se ky shkurtim i kohës së praktikës mundëson pjesëmarrje më të shpejtë të mësuesve në portal e më pas edhe për punësim.
Urdhri i ministrisë përcakton dhe kriteret e reja për vlerësimin e praktikantëve. Për praktikantët që mungojnë në më shumë se 30 % të orëve të programuara, koha e praktikës do të shtyhet me më shumë se një muaj.
Shtyrja e praktikës mund të bëhet vetëm tre herë.
Për vlerësimin përfundimtar do të ngrihet një komision i posaçëm pranë Zyrave Vendore të Arsimit Paraunvesitare, i cili do të monitorojë ecurinë e çdo studenti që do të hyjë në sistem si arsimtar.
30 ditë pas përfundimit të praktikës, komisioni duhet të përfundojë vlerësimin për kandidatët e ardhshëm për mësues.
/e.d
