Sot në media u përhap me shpejtësi lajmi se Majlinda Bregu kandidon për një post në një organizëm të huaj që menaxhohet nga Bashkimi Europian. Po në media u tha se vendi i është siguruar nga Kryeministri Rama.
Bëhet fjalë për Keshillin e Bashkepunimit Rajonal, ku është çelur gara për Sekretarin e Përgjithshëm dhe garojnë kandidatë nga gjithë vendet anëtare të Europës Juglindore mes tyre Kosova dhe Shqipëria. Deri më tani ky organizëm është drejtuar nga serbë dhe kroatë dhe kësaj radhe synon edhe Shqipëria përmes kandidaturës së ish-ministres së Integrimit, Majlinda Bregu.
Siç bëri të ditur përmes një statusi në facebook, znj. Bregu ka aplikuar vetë për këtë post, por procedura zyrtare dikton që shkresa të përcillet nga Ministria e Jashtme shqiptare. Nota verbale me firmë të drejtorit të MPJ, Ferit Hoxha i është nisur sot Presidences sllovene të SEECP ( Evropa juglindore)
Gara është e hapur dhe kandidatë të mundshëm janë të gjitha vendet e Europës Juglindore, si Serbia, Bosnja, Sllovenia, Bullgaria, etj. Procesi është i gjatë dhe pritet të mbyllet në qershor, ndërsa emrat e kandidatëve për Sekretarin e ri të Përgjithshëm të RCC kalojnë në disa raunde ku rol kyç në vendimmarje ka Komisioni Europian.
Ministrat e Jashtëm të Shqipërisë dhe Kosovës, përkatësisht Ditmir Bushati dhe Behgjet Pacolli kanë secili nga një votë, që me gjasë do të jetë për Majlinda Bregun si e vetmja kandidate shqiptare në këtë garë.
Janë ministrat e Jashtëm të BE dhe Komisioni Europian që në fund zgjedhin se kush do ta drejtojë këtë organizëm të rëndësishëm përgjatë viteve 2019-2022.
Nëse i hedhin një sy dispozitave ligjore në nenin 19 i statutit te RCC, thuhet se kandidati duhet të jetë një figurë e fortë politike që ka marrëdhënie të mira me qeveritë e vendeve dhe partnerët ndërkombëtarë. Znj. Bregu njihet me për marrëdhënie të ngushta me Komisonin Europian, pasi ka qene ministre dhe kryetare e komisionit të integrimit.
