Prej ditës së mërkurë, pensionistët do të kenë mundësi të tërheqin në zyrat e Postës Shqiptare shpërblimin e fundvitit prej 6 mijë lekësh të rinj.
Instituti i Sigurimeve Shoqërore ka miratuar kalendarin e ndarjes së shpërblimeve. Ndërkohë që Posta Shqiptare, njofton se deri në datën 29 dhjetor 2016 Posta do të punojë me dy turne.
Posta Shqiptare bën të ditur se, duke filluar nga sot nga ora 07:30 deri në orën 20:00, Posta Shqiptare do të punojë me dy turne, përfshirë edhe ditën e shtunë dhe të hënën, pavarësisht se janë ditë pushimi, për ndarjen e shpërblimeve për pensionistët në të gjithë vendin.
Për 150 mijë pensionistët që e marrin pensionin me shërbim në shtëpi, Posta Shqiptare bën të ditur se, ky shërbim për ndarjen e shpërblimeve do të jetë falas.
Sipas grafikut të ISSH-së, sot do ta marrin pensionin personat që kanë datën e tërheqjes së pensionit, ndërsa pas orës 14:00 do të marrin shpërblimin pensionistët që e kanë marrë pensionin në datën 1 dhe 2 dhjetor.
Në datën 22 dhjetor do ta marrin datat 1 dhe 2 dhjetor
Në datën 23 dhjetor do ta marrin datat 3, 4, 5 dhjetor
Në datën 24 dhjetor do ta marrin datat 8, 9, 10 dhjetor
Në datën 25 dhjetor do ta marrin datat 11, 12 dhjetor
Në datën 26 dhjetor do ta marrin datat 15, 16 dhjetor
Në datën 27 dhjetor do ta marrin datat 17, 18,19 dhjetor
Në datën 29 dhjetor do ta marrin datat 20, 21 dhjetor
Ndërkohë, më 30 dhjetor do t’u jepet mundësia të gjithë atyre që nuk do të arrijnë ta tërheqin në datat e përcaktuara më sipër. Me këtë grafik do të punohet deri në përfundimin e shpërndarjes së shumës përkatëse për çdo kategori deri në fund të muajit dhjetor, që shpërblimi të merret nga pensionistet para festave të fundvitit.
Nga ky vendim do të përfitojnë gjithsej 598 203 persona. Posta Shqiptare dhe Instituti i Sigurimeve Shoqërore kanë firmosur një marrëveshje bashkëpunimi përmes së cilës kanë përcaktuar kalendarin e ndarjes së shpërblimeve./a.m.
