Partia Demokratike akuzoi qeverinë se ka dështuar t’u japë strehë mijëra njerëzve, banesat e të cilëve janë dëmtuar rëndë nga tërmeti.
Ish-deputetët e PD-së Gent Strazimiri, Enkelejd Alibeaj dhe Xhemal Gjunkshi, sipas fakteve të mbledhura në zonën e Sukthit dhe të Ishmit, pretendojnë se banorët e fshatit janë më të braktisurit.
“Askush nuk ka ardhur të na shohë’ është përgjigja që jep secili prej tyre, kur pyeten se çfarë ndihme u ka dhënë qeveria apo pushteti lokal. Më e keqja është se shtëpitë e pabanueshme dhe të rrezikshme nuk kanë asnjë vlerësim nga autoritetet. Dëshmitë e banorëve te Sukthit dhe të Ishmit provojnë paaftësinë e qeverisë për të menaxhuar situatën, kur po bëhet një muaj nga tërmeti i 26 nëntorit”, shprehet PD.
Po ashtu PD shprehet se “Qeveria ka dështuar totalisht t’u japë strehë mijëra njerëzve, banesat e të cilëve janë dëmtuar rëndë nga tërmeti”.
