Pas humbjes së thellë në Dibër, e cila nuk pritej, në Partinë Demokratike ka plasur debati. Në mbledhjen e djeshme të grupit parlamentar, Eduard Selami dhe Majlinda Bregu kanë kritikuar ashpër drejtimin e kësaj partie nga ana e Lulzim Bashës. Sipas tyre, PD është në një situatë kritike. Gjë që e ka pranuar edhe vetë Sali Berisha.
“Unë nuk u heq asnjë presje atyre shqetësimeve që u ngritën këtu për strukturat, por nuk mund të shprehem pasi nuk kam qenë në terren, sepse, siç e kam premtuar, nuk do të përfshihem në fushatë.
PD-ja duhet ta themi që është afër një momenti shumë kritik, por jo të pashpresë, dhe kjo e gjitha për shkak të drogës që e kanë kthyer vendin në Kolumbi.Këtu s’ka më zgjedhje. Problemi më i madh është pushteti i pakufishëm që kriminelët kanë marrë falë mbështetjes së qeveritarëve.
Por zgjidhja për të gjitha këto shqetësimet që dolën në Dibër mund të vijë vetëm nga Tirana dhe nga vendimmarrjet që ne duhet të marrim këtu. PDja kurrë nuk duhet lëshuar që të shkojë drejt krimit dhe drogës për t’u barazuar me kundërshtarin tonë politik.
Në PD duhet të mbizotërojë forca e ideve dhe vlerave që kjo forcë ka pasur historikisht. Është i nevojshëm një dialog intensiv dhe i drejtpërdrejtë me qytetarët”, mësohet se ka thënë Berisha gjatë kësaj mbledhje./tema/a.k
