Ministrja e Energjisë dhe Infrastrukturës, Belinda Balluku tha në një komunikim për mediat pas mbledhjes së qeverisë se porti i Durrësit nuk ka asnjë përgjegjësi për mbetjet e rrezikshme drejt Tajlandës.
“Në territorin e portit të Durrësit operojë koncesionarë të ndryshëm, Autoriteti Portual me koncesionarin që ka kryer këtë transport janë dy entitete konkurrente. Të mos e kthejmë këtë çështje procedurale në një çështje kombëtare dhe ndërkombëtare”, tha Balluku.
Balluku komentoi edhe vendimin e Kurum për të mbyllur aktivitetin, çka do të nxirrte të papunë 500 persona. Teksa theksoi se qeveria shqiptare edhe më parë ka pasur konflikte me Kurum të cilat i ka zgjidhur edhe juridikisht, Balluku u shpreh se Kurum duhet të japë shpjegime lidhur me situatën e krijuar, që siç tha është çështje sociale dhe prek 500 familje.
“Ka të bëjë me 500 familje, ka ndodhur para dy ditësh, ka pasur një njoftim të Kurum ditë më përpara pranë bashkisë Elbasan për një vështirësi sa i përket veprimtarisë. Qeveria shqiptare nuk është hera e parë që ka konflikte me Kurum, që janë ndjekur edhe juridikisht, disa ditë më parë fituam një gjyq në arbitrazh lidhur me shkeljet në koncesion nga Kurum. Kurum do jetë i detyruar të japë shpjegimet e duhura, pasi kemi të bëjmë me një çështje sociale”, u shpreh Balluku.
/a.r
