Plot 318 persona nuk janë lejuar të dalin jashtë shtetit gjatë muajit janar, nga porti i Durrësit Policia e qarkut jep detajet e këtij muaji, ku thotë se këtyre personave u është refuzuar dalja, pasi nuk justifikonin qëllimin e udhëtimit, kishin mungesë mjetesh financiare, kishin konsumuar ditët e qëndrimit, ishin të kthyer deportiv, me refuzim hyrje, apo mungesë dokumentacioni.
Ndërkaq, sipas të dhënave të publikuara për strukturat e drejtorisë vendore për kufirin dhe migracionin në Durrës, janë evidentuar dhe dokumentuar 36 vepra të ndryshme penale, për të cilat janë proceduar 35 autorë.
Gjithashtu është hartuar një Plan–Operacioni i përbashkët me Tiranën, Fierin, Delta Forcë dhe Administratën e Zonave të Mbrojtura Fier, “Mbi parandalimin, zbulimin, dokumentimin dhe goditjen e kultivimit dhe trafikimit të lëndëve narkotike përgjatë vijës bregdetare”.
Në operacion morën pjesë, strukturat e drejtorisë vendore të Kufirit të Durrësit me Sektorin e Hetimit, shërbimet e Stacioneve të Policisë Kufitare Spille, Divjakë, Golem, Fier dhe “Delta Forca” e Administrata e Zonave të Mbrojtura Fier.
Gjatë operacionit u kontrolluan territore të Spillesë dhe Divjakës, stane, ndërtesa të braktisura, ish-depo ushtarake, gryka lumenjsh, zona të pyllëzuara si dhe gjithë vija bregdetare.
“Po në kuadër të luftës kundër trafikimit të lëndëve narkotike, Drejtoria e Kufirit Durrës ka bashkëpunim të ngushtë me homologët italianë, GdF dhe me DVP Durrës duke shkëmbyer informacion për persona që mund të ushtrojnë veprimtari kriminale në fushën e narkotikëve”, bën të ditur policia e Durrësit.
a.ç
