Genc Pollo, kryetar i Komisionit Hetimor Parlamentar për administratën publike, ka bërë të ditur në Facebook se ka një listë me 130 emra zyrtarësh me të kaluar kriminale. Ai u ka kërkuar iformacion dikastereve që kanë në varësi këta zyrtarë nga i gjithë vendi, midis të cilëve edhe Kelmend Balili.
“Lista 130 me Escobarin brenda. Javën e shkuar, si kryetar i Komisionit Hetimor Parlamentar për administratën publike, i dërgova letër (‘kërkesë për informacion’ quhet zyrtarisht) katër ministrave të qeverisë (të Brendshmit, të Drejtësisë, të Financave e të Sociales) për të na sqaruar mbi një listë prej 130 personash.
Këta janë drejtorë, shefa e më gjerë të emëruar në epokën rilindiste nga Kopliku në Kolonjë e nga Ksamili në Kukës. Opozitës i rezultojnë këta si burgaxhinj dje dhe problematikë sot. Ndërkohë, në mesjavë plasi skandali i ‘Eskobarit’ të Ballkanit dhe vura re se ai ishte nr.11-të në këtë listë.
Presim përgjigje e do të marrim vesh mbase cilët ndër 129 të mbeturit do të fitojë nofkën ‘Totó Riina’, ‘Tommaso Buscetta’, ‘Jack the Ripper’ e ‘Al Capone’ i Ballkanit”, shkruan Pollo në Facebook.
D.I.
