Teksa ka inspektuar zonat e prekura nga përmbytjet në qarkun e Vlorës, deputeti i LSI-së Shezai Rrokaj i ka kërkuar llogari qeverisë për 7 mln eurot e investuara sipas tij në argjinaturat e Vjosës të cilat nuk dhanë asnjë rezultat.
Rrokaj tha se nëse nuk nxirren përgjegjësitë situata do të përsëritet vit pas viti. Analizë Rrokaj kërkoi edhe për përmbytjen e autostradës Tiranë-Durrës.
“Kam qenë në dy zona, pranë Mifolit dhe këtu në Novoselë. Problematika është shumë e vështirë, uji nuk ka rënie për momentin dhe pritet të ketë akoma prurje të tjera siç po tregon dhe moti. E rëndësishme është që gjithë strukturat të merren me shpëtimin e jetës së njerëzve, pastaj të gjësë së gjallë, pastaj të minimizohen dhe demet që po pësojnë familjet. Ka mjaft familje dhe fshatra të tëra që janë nën ujë. Është një apel i madh jo për të ngatërruar punën e Zotit me ato të qeverisë, por për ti thënë kësaj qeverie se vite më parë u premtua se në Vjosë nuk do të kishte më probleme, u tha se do të investoheshin 7 milion euro. Pasi të kalojë kjo situatë të jepet përgjigje se pse pasi janë shtuar dhe këto prurje lumi shpërtheu dhe kemi po të njëjtën gjendje që kemi pasur dhe më parë. Sot për sot nuk ja vlen të bëhet kjo analizë”, tha Rrokaj./a.m.
