Për të parin e Lëvizjes për Bashkim, Valon Murati, iniciativa për zhbërjen e Gjykatës Speciale, mbrëmjen e 22 dhjetorit ishte një befasi e pakëndshme, e cila lë përshtypjen e një “shteti palaço”.
“Diçka që ishte bërë me shumë presion të madh, mbase prej atyre që e filluan këtë iniciativë. Është e dhimbshme, sepse na paraqet si shtet joserioz karshi obligimeve ndërkombëtare”, ka thënë Murati, në “Interaktiv” të KTV-së.
Murati ka thënë se Specialja nuk është ndalur kur është dashur të ndalet. “Tash duhet t’i dalim ballë, duhet të përballemi edhe me pasojat që sjell ajo.
Fatet individuale e të partive mund të tejkalohen, por pasojat do të mbesin te njolla që do t’i bëhet përpjekjeve tona për liri, për të cilën duhet të punojmë që ta heqim. Ne e dimë që lufta jonë ka qenë e pastër”, ka thënë ish-ushtari i UÇK-së.
Murati ka thënë se partia të cilën ai i prinë, Lëvizja për Bashkim, “gjithmonë ka qenë kundër Gjykatës Speciale”. “Sepse nuk është vetëm njollë, por ishte e padrejtë ndaj luftës tonë të drejtë çlirimtare. Por tash kemi marrë obligime ndërkombëtare.
E zhbërja e saj të kthen në një shtet joserioz, mos të them palaço”, ka thënë Murati, përcjell Koha.net. Për natën e 22 dhjetorit të vitit të kaluar, kur 43 deputetë kishin bërë kërkesë për seancë të jashtëzakonshme në të cilën synohej të rrëzohej Specialja, Murati ka pasur edhe një koment.
“Krejt ajo u bë pa një debat paraprakë, që të thuhej nëse kanë ndrruar rrethanat, se me ato rrethana të reja duhet të shkojmë në një tjetër drejtim, Por njësoj ashtu siç u bë pa debat, ashtu pa debat edhe u bë përpjekje që të zhbëhet”. (b.an)
