Kur nis të tregosh se çfarë ke në xhep
Ka një listë të gjatë tashmë ILDKP-ja me emra që po dërgohen në dyert e prokurorisë. Tom Doshi është i fundit i një aradhe e cila pret të shtohet shumë më tepër. “Pasaktësi në deklarimin e tij të pasurisë janë vënë re dhe në vitet e shkuara, por drejtuesit e institucionit në të kaluarën i kanë mbajtur ato të fshehura nuk i kanë dërguar ato në prokurori”, thuhet në njoftimin e ILDKP-së. Bëhet fjalë për mospërputhje që shkojnë deri në nivelin e 23 milionë eurove. Çfarë po ndodh? I ka shkarë këmba Doshit dhe të gjithë po i japin një të shtyrë për më poshtë? Nuk duket kështu sepse lista as fillon me të dhe me gjasa, as nuk mbyllet me të. Të tjerë pesha të rënda të politikës që kanë për detyrim ligjor deklarimin e pasurisë do të duhet të sqarojnë burimet e krijimit të saj përpara prokurorisë. Edhe se pse shumë nga ta, zanatin e politikanit e kanë bërë si ato kurset kundër analfabetizmit që ndiqeshin dikur: part time, siç thuhet sot me një term gjysëm anglez në viset ende të rrëmujshme të shqipes. Që do të thotë, janë marrë në liri të plotë, shumë shpesh edhe në liri të plotë nga ligji me punët e tyre sa kohë duhet të merreshin me punët e një ligjvënësi apo zyrtari të administratës. Duke e përdorur herë imunitetin si mburojë dhe herë firmën zyrtare si në numër privat llogarie.
Dhe për të mos harruar: në kodin penal jo vetëm të Shqipërisë, por kudo në botë, moskryerja e rregullt e detyrës është vepër penale. Janë denoncuar në të njëjtën kohë ish-drejtuesit e ILDKPS-së?
