Ndryshimet Kushtetuese në Maqedoni, që i hapën rrugën emrit të ri Republika e Maqedonisë së Veriut, ka ngjallur reagime pozitive edhe në politikën shqiptare. Qeveria, Presidenca, Parlamenti, si dhe faktorët politikë të pozitës dhe të opozitës kanë reaguar njëzëri për këtë zhvillim në Maqedoninë fqinje, që i hapi rrugën ndryshimit të emrit, pas miratimit në Kuvend të nismës për ndryshime kushtetuese me 80 vota pro.
Rama
Ka qenë Kryeministri Rama i pari zyrtar shqiptar, i cili përmes një statusi në tëitter përshëndeti këtë zhvillim mjaft domethënës për vetë Maqedoninë.
“Gëzuar ditëlindjen Republika e Maqedonisë Veriore. Urime të përzemërta kryeministrit Zoran Zaev dhe të gjithë atyre që luftuan për këtë moment historik. Një derë e re e të ardhmes u hap sot për dy popujt tanë në Republikën e Maqedonisë Veriore”, shkroi një ditë më parë kryeministri Rama në Tëitter, duke u bërë i pari zyrtar shqiptar që përshëndeti votimin.
Meta
Arritja e qeverisë së Zaevit në Parlament u përshëndet edhe nga presidenti Ilir Meta.
“Votimi në Kuvendin e Maqedonisë pro nismës për ndryshimet kushtetuese është një hap i rëndësishëm shprese e besimi, se procesi i anëtarësimit të Maqedonisë në NATO dhe BE është në rrugën e duhur. E përgëzoj qeverinë e kryeministrit Zaev për përpjekjet e vendosura në këtë drejtim dhe të gjithë ligjvënësit e Kuvendit të Maqedonisë për mbështetjen e një procesi, që jo vetëm çliron Maqedoninë nga një ngërç integrimi disavjeçar, por ndikon edhe në sigurinë, stabilitetin e mirëqenien e rajonit tonë”, shkruajti Meta në Facebook.
Bushati
Ndërsa ministri i Jashtëm, Ditmir Bushati zgjodhi një shprehje të Nelson Mandelës për të përshëndetur votimin në Parlamentin e Maqedonisë për çështjen e emrit.
“Mandela thoshte ‘Gjithmonë të duket e pamundur diçka, derisa të realizohet’. Votimi në Parlamentin maqedonas për ndryshimet kushtetuese është një hap i madh drejt zbatimit të marrëveshjes së Prespës. Një demonstrim i qartë i bashkëpunimit politik, që hap rrugën drejt BE-së dhe NATO-s”, shkruan në Tëitter kryediplomati shqiptar Bushati, i cili uron homologun e tij Nikola Dimitrov, por edhe zv.kryeministrin shqiptar Bujar Osmani me këtë rast.
Basha
Vlerësim për votimin ka treguar edhe kryetari i PD Lulzim Basha, i cili ka qenë i fundit nga politikanët shqiptar që ka reaguar lidhur me zhvillimet në Maqedoni.
“Mbrëmë, Parlamenti i Maqedonisë i hapi rrugën ndryshimeve kushtetuese, që mundësojnë anëtarësimin e saj në NATO. Përzemërsisht përshëndes këtë hap dhe ndryshimet e pritshme kushtetuese, proces që do të na bashkojë edhe si aleatë rreth vlerave të përbashkëta euroatlantike”, shkruan Basha në rrjetet sociale.
ma.me/javanews.al
