Kremtimet e 10-vjetorit të Pavarësisë në Kosovë nisën që të premten, kulmuan të shtunën me ceremoni e organizime të ndryshme kulturore, përfshirë koncertin gjigant të Rita Orës, e vazhdojnë këtë të dielë me seancën solemne të Kuvendit, në orën 12, e një orë më vonë me parakalimin e Forcave të Sigurisë në sheshet “Nënë Tereza” dhe “Zahir Pajaziti”, në Prishtinë.
Në këtë seancë po marrin pjesë edhe shumë personalitet nga rajoni dhe bota.
Të pranishëm në seancën solemne ishin nga presidenti Meta, te kryeministri Rama, kreu i Kuvendit të Shqipërisë, Gramoz Ruçi, por edhe kreu i PD-së, Lulzim Basha dhe ish-kryeministri Sali Berisha.
Ndërkaq të pranishëm janë edhe ish-senatori amerikan Eliot Engel, ish-presidenti kroat Stipe Mesic, ish-kryeministri i Turqisë Ahmet Davutoglu, kryetari i Kuvendit të Maqedonisë Talat Xhaferi, ish-administratori i UNMIK-ut Bernard Kuchner, ish-ambasadori i OSBE-së William Walker, ambasadorë dhe mysafirë nga shumë vende të botës.
Fjalën e parë e ka marrë kryeparlamentari i Kosovës, Kadri Veseli, që pasi uroi vendin për dekadën e parë të pavarësisë, theksoi se dekada e dytë e shtetit kërkon më shumë punë e përgjegjësi. Në këtë drejtim, ai renditi transformimin ekonomik, si angazhimin kryesor të institucioneve të vendit.
“Sfida e transformimit ekonomik të vendit është më e lehtë se çlirimi dhe ndërtimi i shtetit. Duhet të veprojmë për të krijuar kushtet e një ritmi tjetër, shumë më të shpejtë e përmbajtësor të zhvillimit ekonomik. Dekada e dytë e pavarësisë duhet të jetë dekada e mirëqenies ekonomike të qytetarëve të Kosovës”, tha ai.
Kosova po e feston dekadën e saj të parë të mëvetësisë në një kohë përshkallëzimi të ndjeshëm të aktivitetit diplomatik, por edhe debateve mbi detyrimet e papërmbushura të shtetit të ri kundrejt proceseve integruese.
Analistët mendojnë se vendi ka arsye të kremtojë, megjithatë ai ndodhet nga ana tjetër përpara një faze kritike të së ardhmes së vet. Sinjalet pozitive, sidoqoftë, nuk munguan që në prag të këtij përvjetori, kur të premten Presidenti Hashim Thaçi njoftoi arritjen e marrëveshjes së rishikuar të Demarkacionit me Malin e Zi.
Pakti mori njëzëri aprovimin e Qeverisë së Ramush Haradinajt, një prej kundërshtarëve më të ashpër të marrëveshjes në variatin e saj fillestar, e të martën pritet votimi në Parlament.
a.ç
