Përparim Rama, Kryetari i Bashkisë së Prishtinës ka njoftuar mediat me një deklaratë të fortë e cila ka shkaktuar orët e fundit të ditës së sotme një përplasje dhe reagim viral të politikës së Kosovës. Rama ka njoftuar bllokimin e “Rrugës A” e cila është e njohur për zhvillimin e madh urban që i jep Prishtinës dhe për faktin se disa herë është promovuar për punime të shpejta.
Kryetari i Prishtinës thotë se ky vendim është kundra interesit publik dhe që ndërlidhet me mbrojtjen e qyetatarëve. Gjyqtarja Vlora Pacolli sipas Përparim Ramës është shkaktarja kryesore e bllokimit të rrugës pas vendimit të dhënë.
REAGIMI I PËRPARIM RAMËS:
Të dashur qytetarë,
Sapo u njoftova nga mediet se shkalla e parë e Gjykatës Komerciale, paska marrë vendim në bazë të të cilit ka atakuar rëndë interesin publik të qytetarëve të Prishtinës, duke i ndaluar punimet në projektin më strategjik të Kryeqytetit dhe momentalisht të Kosovës, “Rrugën A” (Jim Xhema).
Vendimi i sotëm, i bazuar plotësisht në interesa politike dhe të grupeve të interesit, të cilat me çdo kusht po përpiqen ta bllokojnë transformimin e Prishtinës, është marrë nga, hiç më pak sesa motra e deputetes së VV-së Fitore Pacolli, gjyqtarja Vlora Pacolli.
Megjithëse nuk jam i prirur që të komentoj vendimet e gjyqësorit, në rastin konkret, nuk ka asnjë logjikë të vendoset masë e përkohshme në kundërshtim me interesin publik dhe ndaj një projekti që ndërlidhet edhe me mbrojtjen e jetës e shëndetit të mijëra qytetarëve të lagjes “Mati”, “Kalabria” dhe “Prishtina e Re”, të cilët me vite të tëra po vuajnë nga kundërmimi për shkak të mungesës së kolektorit.
Andaj, shpresoj se Dhomat e Shkallës së Dytë të Gjykatës Komerciale nuk do të lejojnë cenimin e interesit publik për interesa të ngushta dhe inate politike. Kërkojmë nga Organi Shqyrtues i Prokurimit Publik si palë direkte në këtë procedurë që të ankohet ndaj këtij vendimi që cenon interesin publik.
Ndërsa, nga Këshilli Gjyqësor i Kosovës, që në kuadër të kompetencave që ka, të sigurohet që ky proces të jetë i drejtë, profesional, i paanshëm, dhe i bazuar vetëm në ligj.
