Kreu i policisë së Tiranës Ervin Hodaj ka dalë në një konferencë për shtyp dhe ka bërë me dije identitetin e autorëve të grabitjes në Rinas. Sipas tij janë po të njëjtët persona që kanë kryer grabitjen në dhjetor të vitit 2015 po në Rinas. Sipas kreut të policisë së Tiranës, njëri prej grabitësve është ish efektiv i kompanisë së sigurisë Rogat, ndërsa dy të tjerë ish pjesëtarë të forcave ushtarake. Aksioni i policisë vijon për kapjen e dy autorëve të tjerë, të cilët tashmë janë identifikuar nga policia.
“Në kuadër të opearacionit ‘Patriot’ forcat e policisë zbuluan dhe dokumentuan autorët e dy grabitjeve të vlerave monetare në Rinas në 3 dhjetor 2015 dhe 9 shkurt 2017. Pas veprimeve hetimore dhe provave shkencore u arrit të provohej dhe dokumentohej implikimi i këtyre shtetasve:
GRABITËSIT E ARRESTUAR
Fation Xhyliu, 33 vjeç, lindur në Lushnje, banues në Tiranë, ish punonjës në sicurety ‘Rogat’;
Ditjon Memlika, 31 vjeç, lindur në Tepelenë, banues në Tiranë, ish efektiv në forcat ushtarake;
Neim Avdulaj, 28 vjeç, lindur në vlorë, banues në Tiranë, ish ushtar profesionist në focat ushtarake të Zall Herrit.
Ernest Kupa, me banim në Krujë, shtetas me biznes privat.
U shpall në kërkim shtetasit me incialet M.A dhe Ç.A.
Janë sekuestruar në cilësinë e proves materiale, vlera në valutën paund, euro e dollarë kanadez e australian… Është provuar tërësisht mekanizmi dhe roli i autorëve në këtë ngjarje. Grupi hetimor vijon me insensitet kërkimin e autorëve të shpallur në kërkim.”-tha Hodaj.
KU ISHIN FSHEHUR PARATË E GRABITURA
Kreu i policisë së kryeqytetit u shpreh se paratë e grabitura ishin fshehur në disa vende.
“Sasia e lekeve është gjetur në disa vende. Ndaj janë veprimet hetimore të karakterit sekret dhe mund të ketë të tjerë që mund të jenë në hetim.”, pohoi Hodaj.
HODAJ: TË ARRESTUARIT ME PRECEDENT PENAL
Hodaj tha gjithashtu se 4 autorët e arrestuar janë persona me precedent penal brenda dhe jashtë vendit.
“Është çështje në hetim por nga informatat që ka policia, disa nga këta persona kanë background të mëparshëm penal brenda dhe jashtë vendit… çështja është në hetim dhe e kam të pamundur që të të përcaktoj rolin e tyre në këto ngjarje kriminale. Drejtoria e Policisë së Tiranës ka mbledhur prova të pakontestueshme që i implikojnë ata në këto ngjarje.”, tha shefi i policisë së Tiranës.
A KA LIDHJE NJËRI PREJ TË ARRESTUARVE ME BANDËN E BABAGJYSHËVE?
Teksa u pyet nga gazetarët nëse emri i një prej të arrestuarve, Ernest Kupa, ishte pjesë e bandës së babagjyshëve, Hodaj pohoi se nuk ka asnjë informacion në lidhje me këtë fakt. “Nuk mund të them këtë në ka apo jo. Nuk kemi asnjë person që ka status të penduarit.”, theksoi ai. Në fund Hodaj tha të arrestuarit nuk kanë lidhje familjare më njëri-tjetrin. “Nga informacionet që ka policia nuk ka lidhje familjare mes tyre.”, përfundoi ai./a.k
