Policia ka marrë masat për garantimin e zhvillimit normal të ndeshjes Skënderbeu- Tirana e vlefshme për Kampionatin Kombëtar të Futbollit, e cila do të luhet nesër në orën 17.00 në Stadiumin e qytetit të Korçës.
Në këtë kuadër përveç shërbimeve policore që janë të pranishme në gjithë ambientet e stadiumit, me qëllim parandalimin e çdo incidenti, dëmtimin e pronës së shtetasve dhe sigurimin e rregullit e lëvizjes së tifozëve, nga ana e strukturave të policisë është vendosur:
Ndalimi i qarkullimit dhe parkimit të automjeteve, nga ora 12.00 e datës 14.12.2016, deri në përfundim të ndeshjes, në rrugën “Niko Kovaçi” dhe unazën përreth Stadiumit. Po ashtu nuk do të lejohen tregtarët ambulantë në këtë unazë dhe në lulishtet përpara dhe pas Stadiumit.
Do të ndalohet përdorimi i pijeve alkoolike, shisheve të qelqit, fishekzjarrëve, materialeve të tjera piroteknike, si dhe mbajtja e çelësave, çakmakëve, monedhave metalike dhe objekteve të tjera të forta të ndaluara në mjediset e Stadiumit, shkruan noa. Nuk do të lejohet hyrja në Stadium e fëmijëve nën moshën 14-vjeç, edhe nëse janë të shoqëruar dhe pajisur me biletë. Qytetarët që janë pajisur me biletë, të marrin masa për paraqitjen në ambientet e Stadiumit përpara fillimit të ndeshjes, duke llogaritur dhe kohën e procedurave të kontrollit, pasi në orën 17.00, do të ndalohet hyrja e mëtejshme në Stadium.
Drejtoria Vendore e Policisë Korçë i kërkon qytetarëve/tifozëve, një sjellje korrekte, të kulturuar, si edhe shmangien e veprimeve të cilat do të cënonin rendin publik.
