Daut Laze është personi më i kërkuar nga policia gjatë tre ditëve të fundit, pasi u arratis në mënyrë spektakolare nga ambientet e burgut të Shënkollit në Lezhë, aty ku janë zhvendosur të dënuarit me probleme të shëndetit mendor.
Pavarësisht kontrolleve, 49-vjeçari i cilësuar me rrezikshmëri të lartë shoqërore nuk është gjendur. Në këmbim të çdo informacioni që të çon tek i arratisuri janë vënë që ditën e parë 10 mijë euro.
Sipas burimeve, mësohet se kryesisht kontrollet janë përqendruar në objekte të pabanuara, në xhami, apo të afërm të tij në Tiranë ku jetonte apo dhe në Çorovodë ku ka lindur.
Pas arratisjes së tij, u arrestuan tre punonjës të burgut të Shënkollit, për shpërdorim detyre. Sipas burimeve punonjësit e burgut kanë pohuar se Daut Laze qëndronte i vetëm dhe nuk shoqërohej me njeri, madje në disa raste u kishte kërkuar të qëndronte i vetëm në qeli.
