Një skandal ka ndodhur mëngjesin e sotëm në radhët e policisë, çka ka sjellë pezullimin e tre punonjësve të Policisë rrugore dhe një Specialist i Seksionit të Hetimit të Krimit në Komisariatin e Policisë Lezhë.
Një 60 vjeçar është aksidentuar për vdekje mbrëmjen e djeshme nga një automjet. Viktima është Gëzim Sulaj, ndërsa nga të dhënat e para mësohet se ai ka qenë duke kaluar rrugën. Automjeti e ka përplasur për vdekje duke u larguar më pas nga vendi i ngjarjes.
Policia e Lezhës e mbërritur në vendin e ngjarjes ka mbuluar trupin e viktimës me batanije dhe e ka transportuar atë me kamionçinë dhe jo me automambulancë drejt morgut të siptalit për të bërë ekspertizën mjeko-ligjore. Kjo ka shkaktuar reagimin e opinionit publik.
Por sipas policisë së Lezhës, ka qenë spitali rajonal i Lezhës i cili nuk ka dashur të nisë asnjë autoambulancë në vendin e ngjarjes.
Megjithatë, strukturat e rendit kanë bërë pezullimin e tre punonjësve të policisë rrugore dhe një Specialisti të Seksionit të Hetimit të Krimit në Komisariatin e Policisë duke nisur ndaj tyre edhe procedimi penal për shkelje të rëndë të “Kodit të etikës” dhe ”Procedurave standarde të punës”.
Nga ana tjetër ka reaguar edhe Drejtori i Spitalit të Lezhës Nevruz Bare i cili ka bërë të ditur se morgu i spitalit nuk ka autoambulancë për transportin e kufomave dhe se me urdhër të ministrisë është e ndaluar rreptësisht që ato të transportohen me ambulancat e spitalit. Bare ka shtuar se për diçka të tillë edhe 2 muaj më pare i ka dërguar një shkresë Drejtorise së Policisë, e cila në fakt duhet të ketë kontratë me shërbimet funerale per të kryer transportin e kufomave.
Ndërkohë, policia vijon punën për identifikimin dhe arrestimin e autorëve të aksidentit me vdekje ndaj 60 vjeçarit Sulaj.
Njoftimi i plotë i policisë së Lezhës:
Më datë 25.04.2015, rreth orës 06.10, në Sallën Operative të Drejtorirë së Policisë Lezhë ka ardhur një telefonatë se në superstradën Lezhë–Laç, në vendin e quajtur Ishull Lezhë, ndodhej një shtetas i shtrirë në anë të rrugës.
Menjeherë në drejtim të vendit kanë shkuar shërbimet e policisë rrugore dhe patrulla e përgjithshme, ku është konstatuar se shtetasi Gëzim Sulaj rreth 60 vjeç, banues në lagjen “SMT” Lezhë, kishte humbur jetën.
Nga veprimet e para të kryera në vendngjarje nga grupi hetimor rezulton se gjatë natës këtë shtetas e ka përplasur një automjet, ku për pasojë ka gjetur vdekjen, ndërsa automjeti është larguar nga vendi i ngjarjes.
Në Spitalin Rajonal Lezhë ka shkuar Patrulla e Përgjithshme Policisë, ku është kërkuar ambulanca, por spitali nuk ka pranuar të dërgojë asnjë auto-ambulancë apo makinë të morgut për të transportuar kufomën.
Në lidhje me refuzimin nga ana e Spitalit për të mos dërguar makinë në vendgjarje për të transportuar kufomën, nga ana e policisë është plotësuar raporti i shërbimit.
Duke u ndodhur në këto rrethana, trupi i viktimës është mbështjellë me një batanije dhe është transportuar drejt morgut për ekspertizë mjeko-ligjore me një kamionçinë e cila është gjetur rastësisht në vendngjarje.
Po punohet për identifikimin dhe kapjen e drejtuesit të automjetit.
Lidhur me mos marrjen e masave nga ana e personelit të urgjencës së Spitalit dhe të morgut të Spitalit për transportin e viktimës nga vendi i aksidentit në drejtim të morgut të Spitalit, Specialistët e Hetimit të Krimit Ekonomik, pranë Drejtorisë së Policisë së Qarkut Lezhë po punojnë për dokumentimin ligjor të këtij rasti dhe ndaj personave përgjegjës do fillojë procedimi penal për veprën penale ” Shpërdorim detyre”.
Ndërsa punonjësit e Policisë, konkretisht tre punonjës të Policisë rrugore dhe një Specialist i Seksionit të Hetimit të Krimit në Komisariatin e Policisë Lezhë janë pezulluar menjëherë nga detyra dhe ndaj tyre ka filluar ecuria disiplinore për shkelje të rëndë të “Kodit të etikës” dhe ”Procedurave standarde të punës”.
