Policia e Shtetit ka ironizuar sot pretendimet e Partisë Demokratike në lidhje me një denoncim për parcelat e drogës në Vlorë.
“Falënderojmë subjektin politik që me deklaratat dhe pamjet e shfaqura sot u bën jehonë aksioneve të Policisë së Shtetit dhe luftës së pandërprerë kundër kultivimit të narkotikëve. Pamjet që u transmetuan sot nga PD janë filmuar nga vetë Policia e Shtetit si pjesë e punës intensive për dosjen hetimore përkatëse” – thotë Policia në deklaratë.
“Bazuar mbi këto hetime u zhvillua aksioni për asgjësimin e këtyre bimëve narkotike dhe vënien para përgjegjësisë ligjore të autorëve të shkeljes së ligjit. Ndërkohë, Policia e Shtetit bën me dije se kanë nisur verifikimet dhe do të vihen përpara përgjegjësisë ligjore e penale të gjithë punonjësit e policisë, të cilët kanë nxjerrë sekretin hetimor, duke ekspozuar detaje të një dosje në hetim” – përfundon policia.
Partia Demokratike publikoi sot disa pamje nga ajri të filmuara nga nje helikopter, por nuk dihet se kush ia ka servirur selisë blu filmimet në fjalë.
