Një hetues i policisë suedeze raportohet të ketë hedhur poshtë një akuzë për sulm seksual, për shkak se dy prej viktimave të supozuara kishin “gjinj gjigantë”. Dy femra e kanë denoncuar në polici një lojtar profesionist të hokejit mbi akull, pasi ai gjoja ka prekur gjinjtë e tyre në klubin e natës Marite, në Ostersund, në veri të Suedisë.
Por, të martën, hetuesi kryesor, Mikael Lundberg, raportohet të ketë thënë se nuk ka pasur dëshmi se lojtari ka sulmuar femrat, apo se ai i ka prekur ato qëllimisht, transmeton Gazeta Express.
“Është i rëndësishëm fakti në këtë rast se dy femrat kishin gjinj gjigantë”, u ka thënë ai gazetarëve të së përditshmes suedeze Expressen.
“Nuk ka qenë i vështirë kontakti me to. Nëse je i dehur dhe duke u mbështetur mbi dikë… eh, pra, mund ta imagjinoni se si mund të ketë ndodhur kjo”, ka thënë Lundberg.
Edhe transmetuesi suedez SVT ka raportuar se Lundberg u ka thënë gazetarëve të tij se njëra prej vajzave kishte “gjinj shumë të mëdhenj dhe se ka qenë e vështirë të shmanget kontakti me to”.
Ish-kryeprokurori i Suedisë, Sven-Erik Alhem, ka kritikuar ashpër Lundbergun për deklaratat e tij, duke i quajtur ato “tërësisht idioteske”, transmeton Gazeta Express.
“Është absolutisht neveritëse. Një deklaratë sensacionale, do të thosha. E pamatur dhe në kundërshti me ligjin”, ka thënë ai për Expressen. “S’mund të dalësh me spekulimet e tua se sa lehtë mund të ketë qenë prekja e dikujt”, ka shtuar Alhem.
Elisabeth Massi Fritz, avokate në Stokholm dhe aktiviste për mbrotjen e viktimave të përdhunimit, ka thënë për gazetën se madhësia e gjoksit nuk duhet të jetë kurrë faktor lehtësues në rastet e sulmeve seksuale.
“Një femër nuk duhet të fajësohet kurrë për sulm seksual ndaj saj, vetëm sepse ajo gjinj të mëdhenj”, ka thënë ajo.
