Largimi i Saimir Tahirit nga Ministria e Brendshme, përveç tronditjes politike, shkaktoi edhe një “tronditje” tjetër: Atë të policisë.
Dje në televisione dhe portale transmetohej gjithë ditën, pritja “emocionuese” e punonjësve të policisë, që përcillnin me mallëngjim, atë që e konsideronin si “ministrin më të suksesshëm”.
Banderola, duartrokitje, ndonjë lot tek tuk, madje edhe një dron me fjalën “faleminderit”.
Drejtoria e Policisë së Fierit arriti deri aty, sa publikoi edhe letrën e një punonjësi policie, që tregonte se çfarë suksesesh kishte arritur Tahiri në këto vite si ministër.
Ma merr mendja që as vet Saimir Tahiri nuk e priste një përcjellje të tillë.
Vetëm se një show i tillë mund t’i shkonte për shtat një organizate politike, jo një institucioni të pavarur dhe të depolitizuar, siç është Policia e Shtetit.
Nën drejtimin e Tahirit, është e vërtetë që policia ka marrë një pamje më qytetare dhe më civile.
Ka fytyra të reja, të sjellshme dhe të komunikueshme, ndryshe nga dhuna dhe arroganca e mëparshme e punonjësve të policisë.
Ka dhe rritje të zbulueshmërisë së krimit (sipas statistikave të vet policisë) dhe sot është më e vështirë që policët të korruptohen, për shkak edhe të kamerave dhe kontrolleve.
Por është po aq e vërtetë, se shumë drejtues policie përfliten se kanë bashkëpunuar dhe janë paguar nga trafikantët e drogës, për të lejuar mbjelljen e qindra parcelave me hashash.
Disa prej tyre janë proceduar nga ana e Prokurorisë.
Është po aq e vërtetë se në këto vite kanë ndodhur disa vrasje tronditëse për shoqërinë, madje në mes të ditës dhe në mes të Tiranës.
Mjafton të përmendet këtu ajo e Artan Santos, vrasësit e të cilit ende sot e kësaj dite janë të lirë.
Dhe duket se nuk do të kapen kurrë!
Është po aq e vërtetë gjithashtu, që Policia e Shtetit mbetet ende e politizuar.
Vetë shfaqja e djeshme është një provë e kësaj gjëje.
Sa që nga fraza e famshme e Tahirit “policia që duam”, ajo u kthye në një polici që s’duam!
Se sa i suksesshëm qe Saimir Tahiri si ministër i Brendshëm, këtë do e vlerësojë koha.
Por largimi i tij tregoi të paktën një gjë, se policia ende nuk është çliruar nga vargonjtë politikë.
Gjë që ka pak gjasa të ndodhë edhe për shumë kohë!
