Policia Rrugore e Tiranës ka nisur monitorimin intensiv të akseve kryesore urbane duke përdorur automjetin inteligjent “Scoud Speed”, për të evidentuar dhe ndëshkuar shkelësit e rregullave të qarkullimit rrugor. Kjo masë ka për qëllim rritjen e sigurisë në rrugë dhe parandalimin e aksidenteve.
Automjeti inteligjent monitoron shpejtësinë, parkimet e gabuara, përdorimin e celularit gjatë drejtimit, mosvendosjen e rripit të sigurimit, si dhe parakalimet e gabuara. Gjatë kësaj jave, janë ndëshkuar 6689 drejtues automjetesh për shkeljet e përmendura.
Policia apelon për drejtuesit e automjeteve që të respektojnë rregullat e qarkullimit, duke shmangur parkimet që pengojnë qarkullimin dhe duke i ndihmuar në parandalimin e aksidenteve.
Njoftimi i policisë:
Policia Rrugore intensifikon kontrollet duke përdorur automjetin inteligjent “Scoud Speed” për evidentimin dhe ndëshkimin e shkelësve të rregullave të qarkullimit rrugor, me qëllim rritjen e parametrave të sigurisë së jetës në rrugë.
Policia Rrugore e Tiranës ka filluar monitorimin e akseve kryesore urbane me automjetin Inteligjent “Scoud Speed” për ndëshkimin e automjeteve të cilat qarkullojnë me shpejtësi mbi normat e lejuara, dokumentimin me prova filmike të automjeteve që pushojnë ne rrugëkalimin e automjeteve të tjera të cilat bëhen pengesë për qarkullimin normal të automjete të tjera dhe herë pas here duke u bërë shkak dhe për krijimin e trafikut.
Njëkohësisht, nëpërmjet mjetit inteligjent janë evidentuar shkelje të tjera të rregullave të qarkullimit rrugor, si përdorimi i celularit gjatë drejtimit të automjetit, mosvendosja e rripit të sigurimit, evidentimi nëpërmjet targës në mënyrë automatike i automjeteve që kanë masa administrative pa paguar si dhe parakalimet e gabuara.
Gjatë monitorimeve me mjetin inteligjent 24/7, gjatë kësaj jave janë evidentuar dhe ndëshkuar vetëm për shkeljet e mësipërme 6689 drejtues automjetesh.
Shërbimet e Policisë Rrugore Tiranë janë të angazhuara me të gjitha kapacitetet njerëzore dhe teknike për të evidentuar dhe dokumentuar shkeljet e rregullave të qarkullimit rrugor, me qëllim qarkullimin e lirë të automjete dhe parandalimin e aksidenteve rrugore.
Policia Rrugore e Tiranës apelon për të gjithë drejtuesit e automjeteve të respektojnë rregullat e qarkullimit rrugor dhe të mos parkojnë në vendet ku bëhen pengesë për qarkullimin normal të lëvizjes së lirë të automjeteve të tjera, pasi automjetet që do konstatohen do zhvendosen me karrotrec në pikën e bllokimit të Policisë Rrugore.
