Policia e Durrësit ka parandaluar një krim duke vënë në pranga një efektiv të policisë bashkiake të Shijakut, i cili dyshohej se do të hakmerrej ndaj një shtetasi me të cilin kishte patur një konflikt disa muaj më parë, e ku kishte mbetur i plagosur.
Sipas policisë në pranga u vu efektivi i policisë bashkiake të Shijakut, Shpend Lima.
“Arrestimi në flagrancë i tij u bë pasi, në lagjen Nr. 13, Durrës, në orët e para të mëngjesit të sotëm, gjatë kontrollit fizik, iu gjet dhe sekuestrua në cilësinë e provës materiale një armë zjarri pistoletë e tipit ”Makarov” dhe 6 fishekë”- njofton policia.
Burimet policore sqarojnë se efektivat e Policisë e kanë mbajtur nën mbikqyrje Limën, me qëllim parandalimin e ndonjë ngjarje të rëndë kriminale. “Kjo, sepse më datë 15.03.2016, ishte konfliktuar me një shtetas, ku Lima mbeti i plagosur”- thuhet në njoftimin e policisë.
Materialet i kaluan Prokurorisë së Rrethit Gjyqësor Durrës për veprime të mëtejshme për veprën penale ”Prodhimi dhe mbajtja pa leje e armëve luftarake dhe e municionit ”parashikuar në nenin 278/5 të Kodit Penal. a.k
