Policia e Shtetit ka reaguar zyrtarisht në lidhje me vrasjen e Klodjan Rashës nga një efektiv i “Shqiponjave”.
Përmes Facebook, ajo shprehet se të gjithë punonjësit e Policisë ndjehen të prekur nga ngjarja teksa ngushëllon familjen e 25-vjeçarit.
Policia thotë se po analizohen të gjitha shkaqet që çuan në incidentin fatal, që i mori jetën Rashës.
Mesazhi i plotë:
Në emër të punonjësve të Policisë së Shtetit, të prekur nga ngjarja e rëndë që ndodhi një ditë më parë në Tiranë, e cila përfundoi me vrasjen tragjike të të riut Klodjan Rasha, i shprehim ngushëllimet më të sinqerta familjarëve, miqve, të afërmve dhe qytetarëve të lënduar nga ky akt.
Pas ngjarjes së ndodhur, krahas hetimeve të nisura nga organet e pavarura, për zbardhjen e plotë të rrethanave të ngjarjes, strukturat përgjegjëse në Policinë e Shtetit po analizojnë në mënyrë intensive të gjithë shkaqet, veprimet, mosveprimet apo faktorë të tjerë që çuan në incidentin fatal.
Policia e Shtetit garanton qytetarët se mbetet e përkushtuar dhe e angazhuar në detyrën e saj për rritjen e sigurisë publike, në mbrojtje të jetës dhe të drejtave të çdo qytetari.
/a.r
