Forcat e Policisë rrugore të Kosovës do të patrullojnë këtë vit për herë të parë edhe në rrugët e Jugut të Shqipërisë, zona të cilat po frekuentohen masivisht nga pushuesit përtej kufirit. Këtë vit shënohet viti i 10 i patrullimeve të përbashkëta me synim garantimin e sigurisë në rrugë!
Për herë të parë, forcat e Policisë Rrugore të Kosovës do të patrullojnë edhe në Jug të Shqipërisë.
Patrullimet e përbashkëta mes dy policive nisën të martën dhe veç rrugës së kombit do të fokusohen në zonat më të frekuentuara nga numri në rritje i pushuesve nga Kosova.
Skënder Ismaili: Ndryshe nga ditët e tjera ne e kemi shtrirë këtë shërbim policor deri në Vlorë dhe Sarandë. Kjo për arsye se mjaft pushues të Kosovës prferojnë bregdetin e jugut.
Drejtori i Divizonit të Trafikut në Drejtorinë e Policisë të Kosovës, Jeton Rexhepi, thotë se qëllimi i këtij bashkëpunimi është garantimi i sigurisë së pushuesve.
Jeton Rexhepi,Drejtori i Divizonit të Trafikut në Drejtorinë e Policisë të Kosovës: Do merremi me disa kundravajtja që ne i konsiderojmë të rrezikshme, sic janë tejkalimi i shpejtësisë apo tejkalimet në vendet e ndaluara.
Patrullimet e përbashkëta mes policive të Kosovës e Shqipërisë nisën 10 vjet më parë. Mbi këtë shembull prej disa vitesh në Shqipëri patrullojnë edhe forca të policisë nga Italia, Maqedonia e këtë vit për herë të parë edhe nga Çekia./l.m
