Policia e Elbasanit ka arrestuar 24-vjeçarin me iniciale A. H., i cili ishte në drejtim të mjetit tip “Benz”, ku u përfshi në një aksident me pasojë dy të vdekur.
Aksidenti i rëndë ndodhi mbrëmjen e djeshme, ku në rrugën rurale Mollas-Selitë, tek “Ura e Sharrës”, në fshatin Kamuna, Cërrik, duke drejtuar mjetin tip “Benz”, ka goditur karrocën që tërhiqej nga një kafshë pune.
Pasi ka goditur karrocën, makina që drejtohej nga 24-vjeçari ka dalë në krah të kundërt ku është përplasur me mjetin tjetër që vinte përballë.
Si pasojë e përplasjes, mbeten të vdekur Agron Shermadhi 48 vjeç banues në fshatin Lumas, Cërrik, i cili ishte pasagjer në një nga automjetet e përplasur si dhe Agim Menci 50 vjeç i cili drejtonte një karrocë të mbushur me misër që tërhiqej nga një gomar. Po ashtu, në këtë aksident mbetën të plagosur edhe dy persona.
Mësohet se ka qenë karroca e viktimës Agim Menci dyshohet të jetë bërë shkak për këtë aksident. Burime për Shqiptarja.com bëjnë me dije se karroca ka dalë nga ara ku viktima kishte mbledhur misër dhe i ka prerë rrugën makinës tip ‘Benz’.
Blutë e Elbasanit bëjnë me dije se materialet lidhur me këtë aksident i kanë kaluar Prokurorisë pranë Gjykatës së Shkallës Parë Elbasan, për veprime të mëtejshme, ndërsa i arrestuar akuzohet për “Shkelje e rregullave të qarkullimit rrugor”. /l.m
