Punonjësit e Policisë së Shtetit do të marrin shpërblim për fundvit.
Pohimi është bërë dje nga zëvendësministri i Ministrisë së Brendshme, Ilir Mustafaraj, ndërsa diskutohej në Komisionin e Sigurisë mbi projektbuxhetin e vitit 2016.
Ai deklaroi gjithashtu se vetëm gjatë këtij viti uniformat blu kanë marrë rreth 220 milionë lekë për orët suplementare, raporton Shekulli.
Mustafaraj përsëriti më tej kërkesën për shtesë fondi edhe për rritjen e pagave për punonjësit e gardës, kërkesë kjo që mori miratimin e anëtarëve të komisionit.
Fondi shtesë për zërin e pagave do të jetë 143 milionë lekë.
“Vetëm gjatë këtij viti Policia e Shtetit është shpërblyer me një fond rreth 220 milionë lekësh për orët suplementare. Ky fond është parashikuar edhe për vitin 2016 për t’u përdorur, por, siç jeni në dijeni dhe ju, kjo është variabël. Përveç këtyre do të marrin edhe shpërblimin për fundvit, është parashikuar”, – sqaroi dje në Komisionin e Sigurisë numri dy i Ministrisë së Brendshme në përgjigje të shqetësimit të deputetit socialist, Pjerin Ndreu nëse ishte parashikuar shpërblimi i fundvitit për Policinë e Shtetit.
