Viti që sapo lamë pas u mbyll me një krye-akuzë dhe një politikan i arrestuar, Lefter Koka për 3.7 milionë euro për inceneratorët.
Kjo premtohet të jetë dhe kryetema e opozitës për sesionin e ri parlamentar.
Monika Kryemadhi ka deklaruar se do të hap të gjitha letrat dhe do të zbulohet e vërteta e asaj që ajo e quan mega aferë kriminale qeveritare me 3 inceneratorët.
Për korrupsion të lartë ka folur dhe Lulzim Basha, ndërsa e ka përmendur këtë çështje në pothuajse çdo dalje e tij.
Për inceneratorët do të vijojë dhe hetimi parlamentar që është planifikuar të mbyllet më 25 janar.
Por kjo nuk do të jetë e vetmja temë e politikës në Parlament.
Parimisht ka dakordësi mes maxhorancës dhe opozitës për ta bërë ligjin e ri elektoral pa pritur zgjedhjet e ardhshme, siç ndodh rëndomë.
Kjo dakordësi pritet që brenda javëve të para të sesionit të ri të konkludohet me ngritjen e Komisionit parlamentar dhe nisjen e punës.
Një tjetër reformë që kërkon konsensus dhe diskutime mes të dy palëve në parlament, është ajo e hartës së re territoriale.
PD e ka kërkuar, duke hedhur dhe disa propozime ndërsa PS e ka pranuar. Vetë kryeministri Rama ka pohuar nevojën për të pasur një ndarje të re administrativo-territoriale.
Masakra zgjedhore elektorale, siç i etiketoi PD-ja zgjedhjet e 25 prillit, do të vijojë të jetë në Parlament, për aq kohë që Komisioni Hetimor do të arrijë në dokument final.
Në kalendarin e punimeve të Parlamentit është dhe pr.ligji i qeverisë, për Birësimet, një temë sensitive pasi prek familjen. /Abcnews.al
