Një operacion i policisë së Tiranës i koduar “Jail” (Burgu), ka vënë në pranga dy persona të akuzuar për vjedhje.
Efektivët e komisariatit nr.6 në Tiranë, kanë parandaluar vjedhjen e një banese mbrëmjen e djeshme, e martë, duke kapur në flagrancë duke vjedhur dy të dyshuarit.
Kështu u vunë në pranga Xh. H., 22 vjeç dhe B. Z., 22 vjeç, lindur dhe banues në Fushë-Krujë.
Të dyshuarit janë kapur në flagrancë nga ana e policisë në momentin që po tentonin të vidhnin banesën e shtetases E. B., në zonën e terminalit të autobusave të jugut, në Tiranë.
Në momentin e ndalimit, policia iu ka gjetur dhe sekuestruar një shumë lekësh të sapo vjedhura në banesë dhe sendet me të cilat bën thyerjen e banesës.
Gjithashtu nga tërësia e veprimeve hetimore të kryera rezulton se dy të rinjtë janë autorë të dyshuar edhe të katër vjedhjeve të mëposhtme:
-Vjedhjes së banesës me qera të shtetases E. N., të ndodhur më datë 4 gusht;
– Vjedhjes së ndodhur më 6 gusht, ku shtetasit B. K., në rruga “Shaban Bardhoshi” i kanë vjedhur varësen e floririt;
– Vjedhjes së banesës së shtetasit B. Sh., të ndodhur më 18 gusht dhe vjedhjes së banesës të shtetasit H. P., të ndodhur më 5 korrik.
Aktualisht vijon puna për dokumentimin e plotë të veprimtarisë kriminale të dy të dyshuarve, ndërkohë që materialet iu referuan Prokurorisë për veprën penale “Vjedhje e kryer në bashkëpunim”.
/a.r
