Nga Spartak Ngjela
Kjo është tragjikomedia më e madhe kombëtare, përderisa ekziston si pyetje. Por sigurisht që sot shqiptarët nuk mund të dhunojnë të ardhmen perëndimore të tyre sepse një grup abuzuesish pritet të jenë nën akuzë. Këta të akuzuar rrezikojnë që të burgosen dhe të dorëzojnë të gjithë pasurinë që iu kanë grabitur shqiptarëve në mbi 20 vjet. Por nga kjo akuzë nuk do të mund të shpëtojnë dot.
Kjo dhe është arsyeja e kësaj gjendjeje të trazuar që po shohim.
Po ndërkombëtarët?
Ata e dinë shumë mirë hallin e të korruptuarëve të mëdhenj të Shqipërisë dhe as që po i përfillin fare.
Po korrupsioni çfarë pritet të bëjë?
Asgjë, do të sorrollatet për të krijuar trazira, por nuk do të ketë më fare forcë.
Po ndërkombëtarët çfarë do të bëjnë?
l.
Delegacioni i Bashkimit Europian iu tha hapur të korruptuarve të mëdhenj të Shqipërisë: “Ne nuk ju pranojnë!”. Kurse këta kanë filluar në jerm të gënjejnë poshtë e lart, por sigurisht që asnjë nuk i beson. Më në hall po duket Saliu. Ai po vjen vërdallë dhe çfarë nuk po lëshon nga goja kundër delegacionit të BE-së. Kurse kryeministri shqiptar tani po kuptohet se është zënë rob nga të vetët dhe po flet broçkulla.
Rama mendoi të ndalonte reformën në drejtësi, jo më mazhorancën, por më opozitën, sepse vetë kishte frikë të dilte hapur. Por, këta të korruptuar tani kanë falimentuar të gjithë bashkë.
Nuk ia arritën dot sado që shumë punuan. Tani shpresën e kanë te destabilizimi i Shqipërisë nëpërmjet krizës parlamentare të krijuar nga Berisha dhe dhjetë të korruptuar pranë tij. Por kjo është e pamundur.
Po politika perëndimore si do të ndërhyjë?
Tani e kanë të thjeshtë sepse Berisha dhe tabori i tij korruptiv i lëshoi vetë vendet në Parlament. Tani politika perëndimore e ka të lehtë që të mbajë sa më shumë zëvendësues nga lista PD dhe LSI, dhe me këtë parlament ta përfundojë shpejt bazën ligjore të Reformës në Drejtësi. Pastaj kuptohet se për vendet vakant që do të mbeten, do të bëhen zgjedhje të pjesëshme kudo ku këta vende ndodhen.
ll.
Menjëherë pas formimit të SPAK-ut, për faktin që do të fillojnë akuzat penale, edhe majtas edhe djathtas, sigurisht që maxhorancës socialiste do t’i kërkohet nga Uashingtoni dhe nga Berlini që të pranojnë e të zgjedhin një qeveri të re me shqiptarë të nivelit të lartë intelektual, shumica e të cilëve pritët që të vijnë nga Perëndimi ku aktualisht janë në punë të rëndësishme. Ndërkohë ka informacion që Uashingtoni ka kontaktuar një numur të konsiderueshëm të tyre.
Pikërisht kjo qeveri do të nisë ristrukturimin modern të shoqërisë shqiptare dhe do të drejtojë edhe skemën për të krijuar tregun e përbashkët Shqipëri – Kosovë; për të vijuar reformën në drejtësi në Shqipëri; për të ristrukturuar sistemin bankar në Shqipëri dhe reformën në treg; për të nxitur realisht investimet në rritjen e prodhimit industrial dhe prodhimit në përgjithësi; për reformën administrative në ristrukturimin institucional të administratës shtetërore. Dhe, gjithashtu, për të vijuar politikisht ristrukturimin demokratik të botës shqiptare në Ballkanin Perëndimor.
Në fakt kjo është arsyeja thelbësore që Beogradi dhe Moska e deri diku edhe Athina janë hedhur në një sulm me veglat e veta këtu për të krijuar destabilizim shoqëror në Shqipëri, por edhe në Kosovë.
Në fakt kjo është arsyeja që opozita doli me tam-tame nga Parlamenti dhe po kërkon përplasje sociale të tipit bolshevik. Por është një përpjekje sa e dëshpëruar edhe e dështuar.
Si mendoni ju, pasi të dëgjojnë Uashingtonin, Brukselin dhe Berlinin që do të flasin hapur kundër opozitës dhe korrupsionit të të dy krahëve të politikës, a mund të ketë më shqiptar që të shkojë në përplasje sociale?
Sigurisht që jo. Do shihni se gjithmonë do ngelet në demonstrim një grusht njerëzish fanatikë partish që do të këlthasin në jerm, por nuk do të bëjnë dot asnjë lloj dëmi shoqëror.
