Te Luftëtari ka pllakosur kriza, financat e klubit janë në rënie të lirë, ndërkohë që futbollistët kanë prej muajsh pa marrë pagat. Skandali shpërtheu sot teksa Drejtori Sportiv i klubit, u kërkon aksionerëve të ndërhyjnë, pasi lojtarët po kërkojnë ndërprerje të kontratës në janar. Përgjigje deri më tani nuk ka, por situata e krijuar nuk mund të mos shfrytëzohet nga klubet rivale.
Ekipi gjirokastrit ka në gjirin e tij disa futbollistë cilësor, si Rapo, Shkurtaj, Xhekson etj. Nëse situata me pagat vijon të jetë kështu, në janar mund të nis shpërbërja e ekipit të Luftëtarit. Dhe në “gjueti” do të hidhen klubet e Superligës, për të afruar ndonjë nga emrat e sipërpërmendur.
Partizani ka shfaqur që herët inters për qendërsulmuesin shtatlart, Vasil Shkurtaj, por listës duket se do ti shtohet edhe një mbrojtës. Pikërisht braziliani Xhekson Ferreira, që luan në mbrojtje dhe ka cilësi të mira për një klub si Partizani. 27 vjeçari është piketuar nga trajneri Skënder Gega, që duket se do t`u kërkojë drejtuesve të klubit të përfitojnë nga situata e vështirë e gjirokastriteve, për të marrë shërbimet e Xheksonit.
Prej dy vitesh braziliani luan në Superligë, dhe është një nga më të spikaturit në rolin e tij. Të “kuqve” do u interesonte shumë Xhekson, pasi do të vendosej në krahun e majtë, aty ku për momentin është Trashi që mbulon boshllëkun.
/TeleSport
