Tifozët nga qyteti i Prishtinës, Plisat kanë bërë thirrje që për ndeshjen e së mërkurës, që Sigal Prishtina e zhvillon kundër BC Astanas, në Pallatin e Rinisë të ketë sa më shumë tifozë në përkrahje të kampionit të Kosovës. Sigal Prishtina, më 4 nëntor me fillim nga ora 19:00 do të përballet me BC Astana, në kuadër të FIBA Europa Cup, transmeton Koha.net.
“I’u bëjmë thirrje të gjitha lagjeve të Prishtinës, që të mërkurën më 4 nëntor, të marrin pjesë në mënyrë masive në ndeshjen e radhës të Sigal Prishtinës. Kjo është ndeshja e parë e që djelmoshat bardhë e kaltër do të luajnë para lojtarit të gjashtë, në kuadër të FIBA-s. Mbledhja e fansave do të bëhet në ora 16:00 te selia e funklubit”, thuhet në postimin e Plisave në Facebook.
Sigal Prishtina kishte humbur ndeshjen e parë në FIBA Europa Cup, në transfertë te klubi nga Rumania, CS Energie. Kurse në Grupin K do të përballet më vonë edhe me AEK Larnaca.
