‘Plisat’ do jenë në Elbasan Arena për ndeshjen Shqipëri-Serbi, ja mesazhi që japin
Tifozët kosovarë të grupit “Plisat” do të jenë në stadiumin Elbasan Arena për ndeshjen Shqipëri- Serbi. Këtë e kanë konfirmuar vetë në një dekaratë të shpërndarë. Ata gjithashtu bëjnë thirrje që të mos bien pre e provokimeve, por të respektojnë rezultatin e ndeshjes.
Deklarata e plotë
Në prag të ndeshjes me Serbinë, ne grupi i tifozëve Plisat nga Prishtina, e ndiejmë për obligim të deklarohemi për interesat, shqetësimet dhe kërkesat tona për këtë përballje. Ky reagim bëhet i domosdoshëm duke e pasur parasysh që cdo lëvizje e Plisave pritet dhe shihet me kërshëri nga opinioni shqiptar. E duke i shtuar kësaj edhe rëndësinë e këtij takimi, nuk ka se si të mos sqarohemi për të gjithë.
Plisat ndonëse janë përballë me rethana shumë të vështira, e kanë pasë të qartë rreshtimin prapa Kombëtares KUQ E ZI. Ky rreshtim i yni është bërë për shumë arsye. Në konsiderojmë se Kombëtarja KUQ E ZI është e vetmja kombëtare që na përfaqëson të gjithë shqiptarëve, të cilët megjithëse të ndarë, kanë qëllimet dhe idealet e njejta. Kombëtarja duke përfshirë lojtarë nga të gjitha trevat shqiptare, konsiderojmë se e len shumë mirë të përfaqësuar secilin shqiptar.
Duke e pasur parasysh rëndësinë e ndeshjes së 8 Tetorit, ne me të drejtë shprehim shqetësimet tona për mbarëvajtjen e këtij takimi. Ne në Kosovë, e tashmë pas ngjarjeve të fundit pas ndeshjes në Beograd besojmë që të gjithë shqiptarët, jemi shumë të vetdijshëm për të gjitha propagandat që shteti, mediat dhe publiku serb janë të gatshëm t’i bëjnë në mënyrë që nëpërmjet të vetë- viktimizimit të tyre, të shuajnë ëndrrën tonë për kualifikim.
Duke pasur parasysh që përtej asaj që shihet në TV si një lojë sportive, futbolli është shumë më tepër se aq dhe rrjedhimisht ne i bëjmë thirrje cdo shqiptari në stadium që përkundër cdo provokimi nga ana e tyre, të kontrollojmë vet situatën dhe ti mundim ata edhe në fushë, ashtu sic i kemi mundur edhe në cdo betejë tjetër.
Në Beograd, ata edhe njëherë e dëshmuan se janë qendra e shovenizmit e racizmit në Ballkan. Ndërsa ne në Elbasan duhet të dëshmojmë se dashuria jonë për atdheun nuk nënkupton urrejte dhe racizëm për tjetrin.
Në fund, duam t’ju bëjmë me dije të gjithëve që pjesëmarrja e Plisave në këtë ndeshje është vetëm vazhdimësi e pjesëmarrjes sonë në të gjitha ndeshjet e kombëtarës, sikurse brenda, ashtu edhe jashtë vendit. Për më tepër, duam t’iu rikujtojmë se Plisat i mbesin besnik Kombëtarës Kuq e Zi tani, sikurse edhe më parë kur ajo nuk ishte edhe aq popullore dhe në trend siç është tani, edhe kur rruga deri në Tiranë ishte 18 orë dhe kur përballeshim me të gjitha llojet e kritikave. Biletat për këtë ndeshje Plisat i kanë siguru nëpërmjetë Federatës Shqiptare të Futbollit, dhe ne i jemi shumë mirënjohës dhe falenderues asaj.
Prishtina gjithmonë do të frymojë KUQ E ZI. Asgjë tjetër nuk e mobilizon kryeqytetin.
E përjetshme është Shqipëria.
Plisat, Prishtinë
