Qytetarët e Kamëz dhe ambientalistë kanë protestuar mëngjesin e kësaj të hëne përpara Bashkisë së Kamzës, kundër hedhjes së mbeturinave dhe djegies në lumin e Tërkuzës.
Protestuesit kanë ndërmarrë edhe një peticion për këtë qëllim, ndërsa kanë kërkuar takim me kryebashkiakun Xhelal Mziu. Ata janë futur në ambientet e brendshme të Bashkisë Kamëz. Ata nuk janë pritur nga kryetari i Bashkisë, Mziu por u është komunikuar se do t’i takojë nënkryetari për të dëgjuar shqetësimin e tyre.
Qytetarët protestojnë prej disa ditësh pasi djegia e mbetjeve rrezikon të sjellë një katastrofë mjedisore në zonën përreth. Ata anohen se djegia e mbetjeve përhap erën e rëndë aq sa ata e kanë të pamundur të hapin dyert dhe dritaret e shtëpive.
Ata kërkojnë marrjen e masave nga Bashkia për të mos hedhur mbetjet në lumë dhe djegien e tyre. Alarmin e katastrofës mjedisore në zonën e Kamzës e dha Report Tv pak ditë më parë. Mbetjet hidhen në lumin e Tërkuzës dhe më pas digjen, duke shkaktuar ndotje masive të të gjithë zonës përreth.
Sazan Guri: Të shpallet zonë emergjence
Ambientalisti Sazan Guri kërkoi shpalljen e zonës së emergjencës në zonën ku hidhen mbeturinat në Kamëz.
“Nuk shkojmë brenda (në Bashki) për tolerim. Ai është i pabesueshëm, e vetma zgjidhje është zgjidhja, do dalim që të shkojë policia dhe makinat e plehrave që t’i marri plehrat dhe t’i çojnë në Elbasan ose në vende të tjera ku ka impiante.
Zona të shpallet zonë emergjence. Le të bëjmë një hap tani, një nesër dhe tre pasnesër.
Është turp i madh, bota shqetësohet për një qese të hedhur në tokë ne kemi kanalet akoma.
Hajdeni qytetarë ta kthejmë në një kauzë kombëtare, rasti është në Kamëz por është edhe në Durrës, ku shkojmë me fëmijët dhe lahemi nëpër lumenj e ujëra të ndotura.
Një përfaqësi e qytetarëve do të zhvillojë një takim me Xhelal Mziun për sa i përket vendgrumbullimit të plehrave në Zall Herr”, tha Guri.
