Me tensione të mëdha, të cilat gati sa nuk kanë shpërthyer me grushtime të pozitës dhe opozitës, është përshkuar të enjten seanca e parë e sesionit vjeshtor të Kuvendit të Kosovës. Sherri ka plasur në momentin që është kërkuar të hiqet nga rendi i ditës pika, ku parashihej të raportonte kryeministri, Isa Mustafa, rreth marrëveshjeve të arritura në Bruksel, kryesisht atë për Asociacionin e Komunave Serbe.
Gjakrat janë “nxehur” kur nënkryetarja e Kuvendit, nga Lëvizja “Vetëvendosje”, Aida Dërguti, e rrethuar nga kolegët e saj opozitarë, për disa çaste ka zënë ulësen e kryetarit të Kuvendit, duke pamundësuar kështu vazhdimin e punimeve të legjislativit. Duke e parë që situata ishte para shpërthimit, kryesuesi i seancës, Sabri Hamiti, ka mbyllur punimet e legjislativit, duke ia gjuajtur “topin” Kryesisë së Kuvendit që të thërrasë seancën e radhës. Derisa, të gjithë deputetët opozitarë u ngritën në këmbë duke shkuar të pjesa lart ku qëndrojnë rend të ulur anëtarët e kabinetit qeverisës, pati shtyrje me duar dhe fjalosje në mes zëvendëskryeministrit, Kujtim Shala, dhe Rexhep Selimit të “Vetëvendosjes”.
Në anën tjetër, në këtë situatë të tensionuar kryesuesi i seancës, Sabri Hamiti, në përpjekje për ta hedhur në votimin kërkesën për shtyrje të seancës, pati tentativa të deputetëve opozitarë për marrje të mikrofonit, ndonëse Hamiti në reagim e sipër shqeu disa fleta që kishte para vetes, duke mbyllur kështu seancën në këmbë, pasi që ulësja e tij ishte e “uzurpuar” nga Dërguti. Në këtë seancë, ku pritej raportimi i shefit të Qeverisë rreth marrëveshjeve të arritura në Bruksel, jo që nuk u pa në sallë vetë ai, por nuk ishte i pranishëm as zëvendësi i tij, Hashim Thaçi, dhe as kryetari i Kuvendit, Kadri Veseli.
Opozita: Mustafa po fsheh diçka
Seanca e parë e sesionit vjeshtor të legjislativit edhe një herë shpërfaqi ndasitë e mëdha të mazhorancës dhe opozitës. Kryeministri, Isa Mustafa, edhe pse kishte kërkuar raportin për marrëveshjet e arritura në kryeqytetin evropian, megjithatë i kishte kërkuar Kuvendit që këtë pikë ta heqë nga rendi i ditës me arsyetimin se nuk janë të pranishëm një pjesë e ministrave të kabinetit të tij qeverisës.
Ismet Beqiri, i LDK-së, e lexoi kërkesën e shefit të tij të partisë, i cili udhëheq edhe me ekzekutivin, derisa kjo kërkesë gjeti mbështetjen e partnerit të koalicionit PDK, por jo edhe të tri subjekteve opozitare. Ramush Haradinaj, i AAK-së, tha se me këtë mosraportim të Mustafës po tregohet se diçka po fshihet parapa marrëveshjeve të arrira në Bruksel. Ndërkaq, Galuk Konjufca, i LVV-së, tha se me këtë kërkesë shefi i Qeverisë vetëm sa i sforcon ato dyshimet nëse ai është kryeministër apo këtë pozitë e mban Hashim Thaçi.
Sipas tij, Mustafa nuk ka qenë në gjendje të raportojë për shkak të mungesës së partnerit të koalicionit, Thaçi. “Isa Mustafa po thotë se nuk mund të vijë në Kuvend, sepse nuk e ka këtu zëvendësin, Hashim Thaçi, dhe kjo është jologjike e banale. Ne kemi informacione të sigurta se në mëngjes ka qenë në ndërtesë të Kuvendit dhe nuk është më larg se 100 metra nga këtu dhe kjo po tregon ikjen nga përgjegjësia”, ka thënë ai. Reagime ka pasur edhe nga shefja e GP të AAK-së, Donika Kadaj-Bujupi, e cila mosraportimin e Mustafës e ka quajtur si fillim dhe fund të qeverisjes së Mustafës. Ajo ka “kërcënuar” Qeverinë se tabori opozitar do të bllokojë kalimin e marrëveshjeve për Asociacionin e Komunave Serbe dhe atë të Demarkacionit për Shënjimin e Vijës Kufitare me Malin e Zi.
Beqiri “selam” opozitës: Fuqia matet me votë e jo me muskuj
Shefi i GP të LDK-së, Ismet Beqiri, ndërkaq veprimin e opozitës, që çoi deri te bllokimi i punës së Kuvendit, e ka quajtur si një përpjekje të opozitarëve për të treguar trimëri.
“Ata tentuan të tregojnë trimërinë e tyre duke uzurpuar foltoren dhe duke ndalur seancën, por në Kuvend forca matet përmes votave. Ne trimërinë po ua lëmë atyre, pasi që ne të tjerët, shumica që kemi 89 vota, qenkemi frikacakë. Veprimi i tyre ka të bëjë me etjen e madhe për pushtet dhe asgjë më shumë”, ka thënë ai.
Duke iu referuar kërkesës së opozitës për dorëheqjen e Qeverisë dhe mbajtjen e zgjedhjeve të reja, Beqiri tha se kjo është një fontanë dëshirash e opozitës.
“Nuk merrem me dëshirat individuale e grupore të opozitës, të cilat nuk janë gjë tjetër veç fontanë e tyre për shkuarje në zgjedhje”, ka thënë ai, duke ia tërhequr vërejtjen Qeverisë se për këtë çështje vendos shumica në Kuvend të Kosovës. Pas polemikave dhe debateve të ashpra në Kuvend, në fund u vendos që Kryesia e Kuvendit të hënën që vjen të marrë vendim që të thërrasë seancën e radhës, në të cilën duhet të raportojë kryeministri i Shtetit, në lidhje me marrëveshjet e nënshkruara më 26 gusht në Bruksel, edhe sa i përket Asociacionit të Komunave Serbe, por edhe rreth Përcaktimit të Vijës Kufitare me Malin e Zi.
