Plani strategjik” i “Stupcave” ka rindezur debatin për të bëmat e ish-komandantëve të Ushtrisë Çlirimtare të Kosovës, gjatë dhe pas luftës, shkruan Koha Ditore. Skeçi i cili u transmetua në KTV në natën e ndërrimit të moteve, portretizon dy komandantë të “pashkolluar”, të cilët mes krismave të armëve të armikut, duke pirë çaj, bëjnë plane si t’i ndajnë sferat e interesit kur të vijnë në Prishtinë. Por, atyre u prish punë ushtari që nuk ndalë automatikun përballë armikut, e për të cilin liria është me shtrenjtë se gjithçka tjetër. Për ta realizuar planin e tyre, dy komandantët eliminojnë ushtarin “rebelë” duke ia veshur tradhtinë.
Që nga paslufta në Kosovë shpesh është komentuar mbi profilin e komandantit që uzurpon, zhvat e kërcënon. Se të tillët ekzistojnë e kanë thënë edhe ish-ushtarë, sociologë e analistë. Por ashpër ndaj skeçit humoristik kanë reaguar përfaqësues të organizatave të UÇK-së, deputetë e familjarë të ish-komandantëve. Kërcënime të shumta humoristët kanë marrë edhe në “Facebook”, por nuk ka munguar as përkrahja ndaj aktorëve Vedat Bajrami, Osman Azemi, Mensur Safqiu e Afrim Krasniqi, për demaskimin e një realiteti të hidhur.
