Brenda muajit dhjetor, Ministria e Transporteve, do të marrë masat për çregjistrimin e rreth 90 mijë mjeteve që nuk kanë kryer asnjë veprim gjatë dhjetë viteve të fundit. Nxjerrja përfundimtare nga sistemi i këtyre mjeteve është përcaktuar në planin e masave kundër informalitetit në fushën e transporteve të bërë publik nga Ministria e Transporteve, gjë që do të kryhet deri në fund të vitit.
“Çregjistrim i përhershëm i mjeteve të regjistruara, që nuk kanë kryer asnjë veprim për një periudhë prej më shumë se 10 vjet (rreth 90 000 mjete)”, citon ministrië Shqiptarja.com.
Po brenda dhjetorit, Ministria parashikon në planveprim edhe përgatitjen e një drafti ligjor i cili u jep mundësinë pronarëve të këtyre mjeteve të kryejnë çregjistrimin, i cili në rast të kundërt do të kryhet nga Drejtoria e Përgjithshme e Shërbimit të Transportit Rrugor. “Ligj për pastrimin e detyrimeve debitore. Personat e interesuar të kenë të drejtën deri në 3 muaj, në të kundërt veprimin e çregjistrimit e kryen DPSHTRR”, thekson Ministria.
