Një milion palestinezë që kanë mbijetuar nën rrethim, dëbime dhe uri, pritet të dëbohen sërish nga Gaza City, qyteti kryesor i Rripit të Gazës. Sipas zyrtarëve ushtarakë afër qeverisë izraelite, plani i kryeministrit Benjamin Netanyahu për pushtimin gradual dhe total të territorit do të nisë nga Gaza City në veri dhe do të përhapet më pas në kampet refugjate në zonat qendrore.
Operacioni parashikon dy faza: fillimisht, dhënien e urdhrit për evakuimin e popullsisë nga Gaza City, ku jeton ende gjysma e banorëve, dhe më pas krijimin e “kampeve humanitare” me spitale dhe tendopola për të strehuar të zhvendosurit. Megjithatë, mbetet e paqartë se ku mund të realizohen këto kampe, pasi pjesa e mbetur e Rripit është mbipopulluar dhe shkatërruar nga lufta.
Shtetet e Bashkuara, edhe pse kundërshtojnë aneksimin e Gazës, i kanë dhënë dorë të lirë Izraelit për operacionet ushtarake dhe kanë premtuar financim prej 1 miliardë dollarësh për zgjerimin e pikave të shpërndarjes së ndihmave humanitare në territor, nga 4 aktualisht në 16 brenda pak muajsh.
Pas evakuimit të Gazës së Veriut, ushtria izraelite planifikon një ofensivë të dytë në zonat qendrore për të zhvendosur popullsinë më në jug dhe për të zbatuar “migrimin vullnetar” që kërkojnë politikanët e krahut ekstrem të djathtë. Kjo përfshin edhe qytetin Deir el Balah, ende pjesërisht i papushtuar, ku dyshohet se ndodhen pengje, gjë që rrit ndjeshëm rrezikun për civilët.
Lufta e re mund të zgjasë 4-5 muaj dhe do të përfshijë 4-5 divizione të ushtrisë izraelite, me rreth 60 mijë ushtarë të angazhuar, një betejë që zyrtarët e lartë e paralajmërojnë si një “Vietnam” për Izraelin për shkak të rrezikut të humbjeve të mëdha dhe rrezikut për jetën e pengjeve.
Ministri i Jashtëm egjiptian Badr Abdelatty kritikoi ashpër heshtjen e vendeve perëndimore, duke e quajtur tragjedinë në Gaza “njollë në ndërgjegjen e komunitetit ndërkombëtar”.
