Indrit Çelaj nga Mallakastra ishte duke rregulluar një kondicioner në një vilë tre katëshe në rrugën Myslym Shyri kur u qëllua me një plumb në kokë ditën e enjte në mesditë, ndërsa të premten në mëngjes ka ndërruar jetë në spital, pasi qëndroi për disa orë në gjendje kome.
Policia ka zbardhur detajet e ngjarjes dhe dyshohet se gjithçka ka ndodhur për shkak të një konflikti të çastit, ndërkohë që është zbuluar se cili është autori i krimit dhe është shpallur në kërkim.
Në njoftimin zyrtar, Policia e Tiranës tha se i dyshuari është shtetasi me iniciale L. V., që mendohet se është kolegu i të plagosurit, megjithëse ende nuk është saktësuar pozicioni i tij. Për të saktësuar plotësisht rrethanat e ngjarjes, duhet dëshmia e Indrit Çelajt, që tashmë është e pamundur.
Të paktën deri në orët e mbrëmjes së të enjtes, 26-vjeçari nuk i ishte nënshtruar ndërhyrjes kirurgjikale, duke qenë se ndodhej në gjendje kome. Nga ana tjetër, Policia ende nuk ka gjetur një dëshmitar tjetër për të rrëfyer ngjarjen, pasi mendohet se në momentin kur ka ndodhur plagosja, në ambientet e objektit që ishte në rikonstruksion e sipër, ndodheshin vetëm i dëmtuari dhe autori.
Policia thotë se grupi hetimor, nën drejtimin e Prokurorisë së Tiranës, po vijon punën për zbardhjen e plotë të rrethanave të ngjarjes dhe po vijojnë kontrollet për të bërë të mundur kapjen e autorit të dyshuar, shtetasit L. V. /l.m
