25-vjeçari Jorgo Rustem është autori i plagosjes së 26 vjecarit Kostandin Ziut mbrëmjen e djeshme në qytetin e Korçës.
Gjatë gjithë ditës së djeshme 25-vjeçari Rustemi dhe 26-vjeçari Ziu kanë lëvizur me një makinë “Renault” të cilën edhe për policinë mendohet të jetë marrë me qera, pasi asnjëri prej tyre nuk dispononte një mjet të tillë.
Burime të siguruara thanë se gjithçka ka ndodhur jashtë një lokali në rrugën “Viktor Eftimiu” në lagjen nr 4 të qytetit të Korçës, shkruan A2 CNN.
Deri tani policia ka pak informacion për motivin e kësaj ngjarje, pasi 26 vjeçari Ziu për shkak të gjendjes së rëndë shëndetësore e ka patur të pamundur të rrëfejë detajet.
Ndërkohë që 25-vjeçari Rustemi vijon të jetë në kërkim nga ana e bluve të Korçës, shkruan A2 CNN.
Policia ka informacion se së bashku me dy miqtë ka qenë e pranishme edhe një femër, por akoma blutë nuk kanë shkuar tek identiteti i saj.
Jorgo Rustem është i njohur për policinë e Korçës pasi është arrestuar në vitin 2020 nën akuzën e shitjes dhe prodhimit të lëndëve narkotike, ku ka vuajtur dënimin në burgun e Drenovës, aty ku është liruar në Shtator të vitit 2023, e aty ku është njohur me 26 vjeçarin Kostandin Ziu, i cili vuante dënimin për të njëjtën akuzë.
Burimet shtojnë se Ziu në vitin 2022, u transferua drejt burgut të Peqinit. Edhe sipas burimeve të Policisë, Rustemi e Ziu gjatë kohëve të fundit shoqëroheshin së bashku në qytetin e Korçës.
