Të shtëna me armë zjarri janë regjistruar në unazën Lindore të qytetit të Shkodrës, në afërsi të stacionit të trenit.
Fillimisht u raportua për persona jo të lënduar por në spitalin rajonal të Shkodrës ka mbërritur i plagosur drejtori i Ndërmarrjes së Ujësjellës Kanalizime Shkodër, Mark Molla dhe i biri i tij me inicalet K.M
Ndërkohë shumë pak pas ngjarjes policia reagoi për ngjarjen duke thënë se ka arrestuar në kohë rekord autorin që qëlloi mbi drejtorin e ujësjellësit. Bëhet fjalë për shtetasin M. P, 43 vjeç, të cilit në momentin e arrestimit iu gjet dhe arma.
Reagimi i policisë për ngjarjen:
Plagosi me armë zjarri pas një konflikti të çastit, Drejtorin e Ujësjellësit në Bashkinë Shkodër dhe djalin e tij, kapet dhe prangoset në kohë rekord autori, falë reagimit të menjëhershëm dhe profesional të Policisë.
Rreth orës 16:00, në lagjen “Mark Lula”, në Shkodër, shtetasi M. P., para banesës së tij, pas një konflikti për motive të dobëta me shtetasin M. M, me detyrë Drejtor i Ujësjellësit në Bashkinë Shkodër dhe djalin e tij K. M., i ka plagosur të dy me armë zjarri pistoletë.
Shtetasi M. M. dhe djali i tij K. M. janë transportuar menjëherë në Spitalin Rajonal Shkodër, ku ndodhen jashtë rrezikut për jetën.
Policia e Shkodrës dhe strukturat e DVP Shkodër, me marrjen e njoftimit, shkuan menjëherë në vendngjarje, duke bërë rrethimin e zonës dhe falë veprimeve të shpejta dhe profesionale bënë kapjen dhe arrestimin në flagrancë të autorit, shtetasit M. P, 43 vjeç, të cilit në momentin e kapjes shërbimet e Policisë i gjetën dhe sekuestruan edhe armën me të cilën ky shtetas plagosi shtetasit M. M. dhe K. M.
Grupi hetimor ndodhet në vendngjarje dhe vijon punën për sqarimin e plotë të rrethanave të ngjarjes.
/e.rr
