Analisti Lorenc Vangjeli tha sot se në këto zgjedhje është e dukshme që ka një dinamikë sa i përket pjesëmarrjes së votuesve.
“Duket se deri në mesditë kemi një pjesëmarrje diku te 30%. Qytetarët janë duke ushtruar pushtetin e tyre për të dëshmuar se cilët do të jenë qira-marrësit e shtetit për katër vitet e ardhshme. Sot janë rreth 3 milionë e 600 mijë shqiptarë aksionerë të pushtetit” – tha Vangjeli.
I ftuar në ‘Klan News’, ai shtoi se 50-60% e shqiptarëve që ndodhen në territorin e Shqipërisë tashmë kanë vajtur në kutitë e votimit.
Vangjeli u shpreh se të pavendosurit mendohet se mund të jenë deri në 25%.
“Kjo i bie të jetë ¼ e votuesve shqiptarë, sa një parti e tretë. Ndodh ndonjëherë një mrekulli sado e vogël. Duket se sot çdo qytetar shqiptar e ndjen që është aksioner i pushtetit. Edhe pse duatrokasin një parti të caktuar, sot të gjithë ndihen njësoj” – tha ai.
I pyetur për krahasimin mes zgjedhjeve 2017 dhe 2021, Lorenc Vangjeli u shpreh:
“Në 2017 kemi harruar elementin bazë të një demokracie. Sot qytetarët janë në kutitë e votimit jo për të zgjedhur kush do t’i drejtojë, por për të zgjedhur opozitën e tyre. Duke marrë parasysh djegien e mandatit, sot po votojnë për ta kthyer Shqipërinë në një normalitet. U dëshmua se vota është shumë herë më e fortë se molotovi. Ajo çka ne pamë të ndodhë në sheshin Skënderbej ishte simbol i asaj që ndodhi së paku në dy vitet e fundit. Kur një pjesë e politikës shqiptare ndërhyri në themelet e sistemit me një shpërthim kamikaze duke u vetëvrarë, por edhe duke hedhur në erë themelin e sistemit. Këto zgjedhje janë një shans për ta rikthyer Shqipërinë në normalitet dhe për t’i kthyer një nga pushtet e munguara, opozitën” –tha Vangjeli për ‘Klan News’.
