Së fundi, Ruja Ignatova, u përfshi në listën e 10 personave më të rëndësishëm, të shpallur në kërkim nga Byroja Federale e Hetimit (FBI) në SHBA. Për gjetjen e saj është vendosur edhe shpërblimi prej 100.000 dollarësh.
“Mbretëresha e Kriptos” akuzohet se me anë të mashtrimit, ka mundur t’u zhvasë miliarda dollarë investuesve mendjelehtë në të gjithë botën. Sipas FBI-së, “ajo kërkohet për pjesëmarrje në një skemë shumë të përhapur mashtrimi, nëpërmjet kriptovalutës së rreme.
Muajin e kaluar, 42-vjeçarja u përfshi gjithashtu edhe në listën e personave më të kërkuar nga Europol, agjencisë evropiane të zbatimit të ligjit. Por emri i saj nuk gjendet më në këtë listë dhe nuk është ende e qartë se pse dhe kur është fshirë emri i saj.
Kush është Ruja Ignatova?
Nënshtetase gjermane që jetonte në Bullgari, Ignatova nxorri për herë të parë në treg kompaninë “OneCoin”, në vitin 2014, gjoja me synimin për të zëvendësuar bitcoin si monedhën kryesore virtuale në botë. Kjo kompani veproi në të gjithë globin dhe në fund të vitit 2016 pretendonte se kishte më shumë se 3 milionë anëtarë.
Por në ndryshim nga bitcoin dhe valutat e tjera digjitale, “OneCoin” nuk u mbështet nga ndonjë rrjet teknologjik publik, i sigurtë dhe i decentralizuar.
E shpallur në kërkim – Ruja Igantova
Sipas FBI-së, kompania bullgare “OneCoin Ltd” pretendonte se zotëronte një rrjet privat të vetin. Kriptovaluta e rreme e saj nuk kishte vlerë reale dhe me të nuk mund të blihej asgjë. Autoritetet amerikane e konsiderojnë atë një nga skemat më të mëdha piramidale në mbarë historinë dhe kanë arritur në përfundimin se Ignatova ishte “truri” i të gjithë kësaj skeme mashtrimi.
Hetimet amerikane vërtetuan se kjo skemë funksiononte si një skemë Ponzi dhe si një rrjet i marketingut shumëplanësh, ku investitorët e hershëm inkurajohen të rekrutojnë të tjerët dhe më pas paguhen nga faturat e investitorëve të mëvonshëm.
Çfarë dihet për vendndodhjen e saj?
Ignatova nuk u pa më në qarkullim, pasi në vitin 2017 ajo dyshoi se FBI kishte nisur hetimet ndaj “OneCoin”. “Hetuesit kanë bindjen se Ignatova u zpraps kur kuptoi se ishte nën mbikqyrjen amerikane dhe të autoriteteve të tjera ndërkombëtare ligjzbatuese” – tha FBI. “Ajo udhëtoi nga Sofja e Bullgarisë në drejtim të Athinës në Greqi, me datë 25 tetor 2017. Që atëherë, nuk dihet më asgjë për të”.
Në vitin 2019, Shtetet e Bashkuara e vunë nën akuzë për mashtrim kompjuterik, pastrim parash dhe mashtrim përmes letrave me vlerë.
Ky subjekt bëri që BBC të prodhonte një podcast të suksesshëm me titullin: “Mbretëresha e arratisur e kriptos”.
Skemë mashtrimi e Ignatovas, e cila nxorri për herë të parë në treg kompaninë “OneCoin”, në vitin 2014, gjoja me synimin për të zëvendësuar bitcoin si monedhën kryesore virtuale në botë.
Kush tjetër është i përfshirë në skemë?
Shumë nga bashkëpunëtorët më të ngushtë të Ignatovas, përfshirë bashkëthemeluesin e “OneCoin”, Sebastian Greenwood, kanë rënë në pranga. Greenwood u kap në Tajlandë në vitin 2018 dhe më pas u ekstradua në SHBA, ku është ende në pritje të nisjes së procesit gjyqësor. Vëllai më i vogël i Igantovas, Konstantin Ignatov, u arrestua në mars të vitit 2019 në Los Anxhelos, si bashkëpunëtor në mashtrim. Ai u deklarua fajtor për mashtrim dhe pastrim parash.
Mark Scott, ish-avokat i kompanisë, u dënua në nëntor 2019, si pjesë e këtij grupi kriminal. Ai u akuzua për pastrim parash që kapte vlerën e 400 milionë dollarëve, duke përdorur një rrjet me kompani dhe llogari bankare offshore, si dhe fonde investimesh.
David Pike, një tjetër i akuzuar, u shpall fajtor vetëm për mashtrim bankar. Në marsin e këtij viti ai u dënua me dy vite shërbim prove./DW
g.kosovari
