Në Kongresin e socialistëve do të marrë pjesë edhe lideri i së majtës europiane Gianni Pitella. Në një intervistë për Top Channel, Pittella bëhet pjesë indirekte e debatit të brendshëm në Partinë Socialiste kur thotë se megjithëse u takon socialistëve shqiptarë që të vendosin, për punën që ka bërë, Edi Rama e meriton rikonfirmimin në krye të Partisë Socialiste.
Ju po shkoni në Shqipëri për kongresin e Partisë Socialiste, a jeni në dijeni të debateve të brendshme?
Sinqerisht jo. Mua më intereson më shumë situata në Shqipëri, ajo çfarë bën qeveria dhe se çfarë do të bëjë, përgjithësisht, kongresi i Partisë Socialiste. Por, nuk më intereson dhe nuk dua të interesohem për ndarësitë dhe nëse ka, ato janë çështje të brendshme të partisë.
Në përgjithësi, partitë e familjes suaj socialiste në Europë, a bëjnë zgjedhje për kryetarin e partisë, edhe kur ai fiton zgjedhjet e përgjithshme në vend?
Po, sigurisht. Në shumë vende, roli i udhëheqësit të partisë përkon me atë të udhëheqjes së qeverisë. Matteo Renzi, për shembull në Itali, është në krye të këshillit të Ministrave, pra kryeministër dhe kryetar i Partisë Demokratike. Njësoj ndodh në disa vende të Europës. Unë nuk shoh ndonjë parregullësi, përkundrazi.
Por, në këto parti socialiste europiane, jo vetëm në Itali, a qëndron kryetari përtej mandatit, pa bërë zgjedhje partiake, edhe kur i ka përfunduar afati?
Këtë e vendosin ekskluzivisht anëtarët e partisë socialiste në Shqipëri. Nuk e vendos as Gianni Pitela e as të tjerët. Ky është një vullnet i lirë dhe i pavarur, që u atribuohet atyre, që mbajnë teserën e Partisë Socialiste Shqipëtare. Unë mendoj se për çfarë ka bërë Edi Rama, si lider i partisë socialiste, si lider vendi, kryeministër i Shqipërisë, meriton që të konfirmohet udhëheqës partie.
TCH/ A. Tozaj
